Трамп қатор НАТО давлатларини овоз бериш ҳуқуқидан маҳрум қилмоқчи

АҚШ Президенти Дональд Трамп Европа Иттифоқи ва Буюк Британиянинг Ҳормуз бўғозини қамалдан чиқариш учун кемалар юборишдан бош тортганидан ҳафсаласи пир бўлган ва АҚШ контингентини Германиядан олиб чиқиб кетиш ҳақида ўйламоқда. Бу ҳақда “The Telegraph” нашри хабар берди.

Қайд этилишича, Дональд Трамп молиялаштириш бўйича талабларини бажармаётган аъзоларни жазолаш мақсадида НАТОни қайта ташкил этиш имкониятини кўриб чиқмоқда. Бунда “тўла ва иштирок эт” (pay-to-play) модели таклиф этилмоқда. Ушбу модель иттифоқчиларни қарор қабул қилиш имкониятидан, жумладан, блокда уруш бошланган тақдирда ҳам маҳрум қилиши мумкин. Хусусан, Трамп агар НАТО аъзолари мудофаа харажатларини ЯИМнинг 5 фоизи миқдорига етказмаса, уларни қарор қабул қилишда овоз бериш ҳуқуқидан маҳрум этишни режалаштирмоқда.

Оқ уй раҳбари ушбу вариантни АҚШнинг Европадаги иттифоқчилари Ҳормуз бўғозини очиш учун ҳарбий кемалар юборишдан бош тортганидан кейин ўрганмоқда.

“Европаликлардан ҳафсаламиз пир бўлгани айни ҳақиқат. 5 фоиз ажратмаётган ҳар қандай давлат НАТОнинг келажакдаги харажатлари бўйича қарор қабул қилишда овоз бериш ҳуқуқига эга бўлмаслиги керак”, дейди АҚШ маъмуриятидаги манба нашрга.

Шунингдек, АҚШ Президентига яқин манбалар Трампнинг Германиядан Америка қўшинларини олиб чиқиб кетиш имкониятини кўриб чиқаётганини айтмоқда. Нашрнинг ёзишича, Трамп 2025 йилда президентлик лавозимига қайтганидан бери ушбу қадамни ўйлаб юрибди.

Ҳозирги босқичда НАТОнинг барча аъзо давлатлари мудофаа учун ЯИМнинг камида 2 фоизини сарфламоқда. Ушбу мақсадли кўрсаткич 2014 йилда (Трамп томонидан) белгиланган.

Эслатиб ўтамиз, аввалроқ Дональд Трамп НАТО давлатларини Эронга қарши урушда иштирок этишни истамаётгани учун танқид қилганди. Шу билан бирга, Оқ уй раҳбари АҚШ гўёки НАТО ёрдамисиз ҳам Эрон Қуролли кучларини аллақачон “йўқ қилиб бўлганини” билдирган.