АҚШ Эрон парламенти спикерини янги етакчи сифатида кўриб чиқмоқда – “Politico”

АҚШ Президенти маъмурияти Эрон парламенти спикери Муҳаммад Боғир Ғолибафни музокаралар учун потенциал ҳамкор ва эҳтимол, ҳатто янги етакчи сифатида кўриб чиқмоқда. Бу ҳақда ўз манбаларига таяниб, “Politico” хабар берди.

Нашр суҳбатдошлари Ғолибаф бўйича ҳозирча ҳеч қандай қарор қабул қилинмаганини маълум қилган.

“Президент маъмуриятида “бир нечта номзодларни стресс-тестдан ўтказишни” хоҳлашмоқда”, дея қўшимча қилган улар.

Ушбу номзодлар рўйхатида Эроннинг сўнгги шоҳи ўғли Ризо Паҳлавий йўқ. Оқ уй Эрон учун “Венесуэла сценарийси”ни кўриб чиқмоқда, бунда мамлакатда қўллаб-қувватланадиган ва шу билан бирга АҚШга содиқ бўлган сиёсатчи ҳокимиятга келади. Трамп маъмурияти Паҳлавийнинг Эронда қандайдир легитимликка эга бўлишига ишонмайди.

Шу билан бирга,“Politico”нинг ёзишича, экспертлар Эрон парламенти спикери, ўз навбатида АҚШга содиқлик кўрсатишига шубҳа қилмоқда.

“Ғолибаф – амбицияли ва прагматик, аммо шу билан бирга исломий тузумни сақлаб қолишга принципиал жиҳатдан содиқ шахс. Бу уни Вашингтонга бирон бир мазмунли ён беришларни таклиф қилиш учун эҳтимоли кам бўлган номзодга айлантиради”, дейди Халқаро инқироз гуруҳининг Эрон бўйича катта таҳлилчиси Али Воиз.

Маълумот учун, Муҳаммад Боғир Ғолибаф Эрон-Ироқ уруши даврида Ислом инқилоби қўриқчилари корпусида (ИИҚК) хизмат қилган. 1999 йилда Эрон полицияси бошлиғи этиб тайинланган. 2005-2017 йилларда Теҳрон мери лавозимини эгаллаган. 2020 йилдан буён Эроннинг бир палатали парламенти – Мажлис раиси лавозимини эгаллаб келмоқда.

“The Jerusalem Post” нашрининг ёзишича, Ғолибаф АҚШ билан музокараларда иштирок этган, шундан сўнг Дональд Трамп Эрон электр станцияларига зарба беришни беш кунга қолдиришга қарор қилганини эълон қилган. Эрон музокаралар бўлгани фактининг ўзини рад этмоқда.

Эслатиб ўтамиз, аввалроқ Вашингтоннинг иттифоқчилари ва Форс кўрфази мамлакатлари Дональд Трампни Эроннинг энергетика инфратузилмасига зарба беришдан қайтаргани ҳақида хабар берилган эди.