Яқин Шарқдаги шикастланган энергия объектлари сони очиқланди

Халқаро энергетика агентлиги (ХЭА) раҳбари Фотиҳ Бирол Яқин Шарқнинг тўққизта давлатида 40 дан ортиқ энергия объектлари жиддий шикастланганини маълум қилди. Бу ҳақда “Bloomberg” хабар берди.

Бугун, 23 март куни Австралия Миллий матбуот клубидаги чиқиши чоғида Бирол нефть конлари, нефтни қайта ишлаш заводлари ва қувурлар фаолиятини тиклаш учун анча вақт талаб этилишини билдирган.

Биролнинг сўзларига кўра, ҳозирги узилишларнинг оқибатлари 1970 йиллардаги иккита йирик нефть инқирози ва 2022 йилдаги газ инқирози билан тенглашиши мумкин. Яқин Шарқда уч ҳафтадан ортиқ давом этаётган низо энергия етказиб бериш занжирларини бузиб юборган ва Ҳормуз бўғозини деярли бутунлай ёпиб қўйган. Бу эса нефть, табиий газ ва ёқилғи нархларининг кескин ошишига олиб келган.

ХЭА раҳбарининг қайд этишича, узилишлар нафақат нефть ва газга, балки жаҳон иқтисодиётининг нефть кимёси, ўғитлар, олтингугурт ва гелий каби баъзи муҳим тармоқларига ҳам таъсир қилади.

Эслатиб ўтамиз, жорий йилнинг 21 март куни Трамп, агар Ҳормуз бўғози 48 соат ичида очилмаса, АҚШ Эроннинг бир қатор электр станцияларини йўқ қилишини айтганди. АҚШ Молия вазири Скотт Бессент Трампнинг баёнотига изоҳ берар экан, АҚШ Президентининг операция тез орада якунланиши ҳақидаги сўзлари ва унинг электр станцияларига зарба бериш билан қўрқитиши ўртасида ҳеч қандай зиддият кўрмаётганини таъкидлади.

Бугун, 23 март куни Дональд Трамп Теҳрон билан Ҳормуз бўғозини кемалар қатнови учун очиш бўйича музокаралар ўтказиш мақсадида мамлакат қуролли кучларига Эроннинг энергетика объектларига бериладиган зарбаларни беш кунга кечиктиришни буюрди.