Даҳшатли қотиллик қурбони бўлган Сайёра учун ғойибона жаноза ўқилди

Туркиянинг Истанбул шаҳри Умрония туманидаги уйлардан бирида ўлдирилган ўзбекистонлик Сайёра Эргашалиева учун ғойибона жаноза намози ўқилди. Бу ҳақда Туркия маҳаллий оммавий ахборот воситалари хабар берди. 

Кеча, 26 февраль куни Шишли туманидаги Фуля маҳалласи масжидида ўқилган жаноза намозида Сайёранинг отаси Баҳром Бўстонов, онаси Соҳиба Бўстонова, Ўзбекистон хотин-қизлар ҳуқуқлари жамияти раиси Озода Исломова ва маҳалла аҳли иштирок этган.

Маросимида сўзга чиққан Сайёранинг отаси Баҳром Бўстонов ва онаси Соҳиба Бўстонова Президент Ражаб Тойиб Эрдўғанга миннатдорлик билдирган. 

“Қизимизнинг руҳи шод бўлсин. Биз Туркия Республикасига, Президент Ражаб Тойиб Эрдўғанга, жиноятни очишга ҳаракат қилаётган Адлия вазирлигига ва турк адолатига ишонамиз. Биз қотиллар энг оғир жазога тортилишини истаймиз. Қизимизнинг ғойибона жанозасини ўқиган Туркия Республикасига, муфтиятга, дўстларимизга, устозларимизга катта раҳмат. Қидирув ишлари давом этмоқда. Ишлар якунлангач, ўлим ҳақида эълон берилади”, деган у.

Сайёранинг вафоти 

Жорий йилнинг 24 январь куни Истанбулнинг Шишли тумани Куюлубоғ кўчасидаги чиқинди қутисидан 37 яшар ўзбекистонлик Дурдона Ҳакимованинг бўлакланган жасади топилди. 

Камера ёзувлари ва гувоҳларнинг кўрсатмаларига кўра, ҳодиса жойидаги ахлат контейнерига қорамтир кийимдаги, соқолли икки эркак оч рангли чамадон билан келгани, кейин яна чамадон билан пиёда кўчадан чиқиб кетгани, гумонланувчилар чамадонни ҳодиса жойига яқин бўлган Бозкурт кўчаси томон ташлаб кетгани аниқланган.

Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчини қўлга олган. Уларнинг иккаласи ҳам Ўзбекистон фуқаролари экани маълум бўлган. Разведка бўлими ва Қотиллик бўлими томонидан бир неча соат ичида ушланган гумонланувчилардан бири қотилликни бевосита содир этган, иккинчиси эса ёрдам бергани аниқланган. Шунингдек, гумонланувчилар фойдаланган таксини бошқарган шахс ҳам қўлга олинган. Шу тариқа иш бўйича ҳибсга олинганлар сони 3 нафарга етган.

Февраль  ойига келиб, мазкур иш доирасида олиб борилган суриштирувлар натижасида Дурдона Ҳакимова ўлдирилган Умрониядаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди.

Туркия ҳуқуқни муҳофаза қилувчи органларидан олинган дастлабки маълумотларга кўра, аввал Дурдона Ҳакимованинг ўлими билан боғлиқ ҳодисадан сўнг бедарак йўқолган деб топилган фуқаро 1994 йилда Наманган вилоятида туғилган Сайёра Эргашалиеванинг айнан Дурдона Ҳкамиова қотиллигида гумонланаётган шахслар томонидан ўлдирилгани аниқланган. Сайёра Эргашалиева Дурдона Ҳакимованинг яқин дугонаси бўлган. 

23 январь куни гумонланувчилар Т.Д. ва Ғ.К. ўзаро тил бириктирган ва Эргашалиевани аввал пичоқ билан ўлдириб, жасадни бўлаклаб, Фотиҳ туманидаги ахлат қутиларига ташлаган. 24 январь куни қотиллар Эргашалиеванинг телефонидан Ҳакимовага SMS хабар юбориб, уни ҳам чақириб, Эргашалиева сингари уни ҳам пичоқ билан ўлдириб, танани бир нечта қисмларга бўлиб, Шишли туманидаги чиқинди қутиларига ташлаган.

Ҳозиргача Эргашалиеванинг жасади топилмаган.