Вашингтон Киевга 15 йиллик хавфсизлик кафолатларини таклиф қилмоқда

АҚШ Украинага 15 йил муддатга хавфсизлик кафолатлари беришни таклиф қилмоқда. Бу ҳақда Украина Президенти Владимир Зеленский “Axios” нашрига берган интервьюсида сўз очди.

Унинг айтишича, мазкур муддат кейинчалик узайтирилиши мумкин, бироқ Киев янада узоқроқ кафолатларни истайди.

“Менимча, бизга 15 йилдан кўпроғи керак”, деган Зеленский. 

У Дональд Трамп билан бўлажак учрашувда АҚШ Президенти бунга рози бўлса, буни “катта муваффақият” деб ҳисоблашини таъкидлаган.

Зеленскийга кўра, хавфсизлик кафолатлари бўйича келишувлар икки давлат парламентлари томонидан ратификация учун тақдим этилади. Унинг айтишича, АҚШ–Украина ўртасидаги икки томонлама битимларнинг асосий жиҳатлари аллақачон келишиб олинган ва бешта ҳужжатда мустаҳкамланган, уларга олтинчи ҳужжат қўшилиши ҳам мумкин.

Шунингдек, Украина Президенти Россия билан уруш тугаганидан кейин Европа давлатларининг Украинани хавфсизлик билан таъминлашдаги иштирокини назарда тутувчи ташаббусни эслатган. Бу жараёнда етакчи роль Франция ва Буюк Британияга берилиши кўзда тутилган.

Зеленский 28 декабрь куни АҚШ Президенти билан бўладиган музокараларда урушни якунлаш шартларини келишиб олишга умид қилмоқда. Унинг сўзларига кўра, агар Россия камида 60 кунлик ўт очишни тўхтатишга рози бўлса, “тинчлик режаси” бандларини Украинада референдумга чиқариш мумкин.

Москва Украинадан ҳудудий ён беришларни талаб қилмоқда, жумладан, ҳозирча Россия армияси назорат қилмаётган ҳудудлар бўйича ҳам. Зеленский Трамп билан учрашув Киевнинг позицияларини мустаҳкамлашига умид билдирган.

Эслатиб ўтамиз, аввалроқ Россия Президенти Владимир Путин ҳали ҳам Анкориж саммитида келишиб олинган муайян ён беришларга тайёрлиги ҳақида хабар берилганди.