Call of Duty ўйини яратувчиси автоҳалокатда вафот этди (видео)

Машҳур видеоўйин Call of Duty’нинг яратувчиси ва Respawn Entertainment компаниясининг ҳамкор асосчиларидан бири Винс Зампелла АҚШда йўл-транспорт ҳодисасида вафот этди. Унинг ёши 55 эди. Бу ҳақда NBC4 хабар берди.

Полиция маълумотларига кўра, Зампелла бўлган автомобиль йўлдан чиқиб, бетон тўсиққа урилган. Йўловчи машинанинг олдинги қисмида чиққан ёнғиндан чиқа олмай вафот этган, ҳайдовчи эса шифохонада ҳалок бўлган.

Зампелла 1990 йилларда видеоўйин саноатида фаолият бошлаган. У GameTek ва Atari компанияларида ишлаган, кейин Medal of Honor: Allied Assault ўйинида етакчи дизайнер бўлган. Кейин Infinity Ward студиясини асос солиб, у ерда Call of Duty 2, Call of Duty 4: Modern Warfare ва Call of Duty: Modern Warfare 2 каби машҳур ўйинларни яратган.

2010 йилда Activision’дан кетганидан сўнг, Зампелла Respawn Entertainment’ни ташкил қилган ва у ерда Titanfall сериясини ишлаб чиқарган. Кейинчалик студия Electronic Arts томонидан сотиб олинган ва унинг раҳбарлигида Apex Legends, Star Wars Jedi: Fallen Order ва Star Wars Jedi: Survivor ўйинлари яратилган.

2021 йилдан бери Зампелла EAда Battlefield франшизаси учун масъул бўлган ва 2025 йилда чоп этилган Battlefield 6 ўйинини бошқарган.

Эслатиб ўтамиз, аввалроқ америкалик актёр ва режиссёр Роб Райнер ҳамда унинг рафиқаси Мишел Лос-Анжелесдаги уйида ўлик ҳолда топилганди.