Трампнинг Украина бўйича янги махсус вакили тайинланди – ОАВ

АҚШ армияси вазири Дэн Дрисколл мамлакат Президенти Дональд Трампнинг Украина бўйича янги махсус вакили этиб тайинлангани айтилмоқда. Бу ҳақда ўз манбаларига таяниб, “The Guardian” хабар берди.

Нашр манбаларининг айтишича, америкалик генераллар гуруҳи келаси ҳафтанинг охирида Москвага учиб, Кремль билан “тинчлик режаси”ни муҳокама қилади. Дрисколл АҚШ вице-президенти Жеймс Дэвид Вэнснинг дўсти ва собиқ синфдоши ҳисобланади. Оқ уй уни Трамп жамоасининг энг самарали аъзоларидан бири сифатида тавсифлайди. Ҳозирда Украина бўйича махсус элчи сифатида ишлаётган ва Киев позициясини қўллаб келган Кит Келлогг истеъфога тайёрланмоқда.

Қайд этиш жоиз, жорий йилнинг 20 ноябрь куни Дрисколл бошчилигидаги юқори мартабали АҚШ ҳарбий амалдорлари делегацияси Киевда Украина Президенти Владимир Зеленский билан музокара ўтказган. Шундан сўнг, Зеленский Трампнинг “тинчлик режаси”ни муҳокама қилишга тайёр эканини билдирган. Делегация Европа вакиллари билан ҳам учрашган. Америкаликлар ўз режасини “деярли муҳокама қилинмайдиган” ҳужжат деб атаб, Украинанинг битимни имзолашга мажбур бўлишини, чунки унинг “жуда ёмон аҳволда” турганини айтган.

Дрисколлнинг ўзи эса “Вашингтон минимал даражада мослашувчанлик кўрсатади”, деб огоҳлантирган. Европанинг юқори мартабали бир амалдори учрашув оҳангини “жирканч” деб атаган. Унинг сўзларига кўра, Дрисколл кўп марта ҳақоратли сўзлар ишлатиб, “бу ахлатни тугатиш керак” деб талаб қилган ва муҳокама тезда чигаллашган. Генерал Трамп кўрсатмасига биноан, Зеленскийдан АҚШда Шукроналик куни нишонланадиган 27 ноябргача битимни имзолашни талаб қилмоқда.

Маълумот учун, Трампнинг режаси 28 банддан иборат. Уни АҚШ Президентининг махсус элчиси Стив Уиткофф Россия Президентининг махсус вакили Кирилл Дмитриев билан маслаҳатлашган ҳолда ишлаб чиққан. Киев бу ҳужжатни Кремль учун жуда қулай, деб ҳисоблайди. Хусусан, режа Россия босиб ололмаган Донбасс ҳудудларининг топширилишини, Украина Қуролли кучларини қисқартиришни, НАТОга киришдан воз кечишни ва мамлакат ҳудудида альянс қўшинларини жойлаштиришни тақиқлашни назарда тутади. Россия учун эса босқичма-босқич санкцияларни бекор қилиш, G8 форматини тиклаш ва ҳарбий жиноятлар учун амнистия таклиф қилинади.

Эслатиб ўтамиз, аввалроқ Украина Президенти Владимир Зеленский мамлакат ҳозир қийин танлов олдида турганини айтиб, халқига мурожаат йўллаган эди. Унинг бу мурожаати Вашингтоннинг жорий йил 27 ноябрь кунига қадар можарони ҳал қилиш бўйича келишув лойиҳаси имзоланмаса, Қўшма Штатлар Украинага қурол-яроғ етказиб бериш ва разведка маълумотлари алмашишни тўхтатиши билан таҳдид қилгани фонида йўлланган.