Собиқ бош вазир “террорчи” деб эълон қилинди

Россиядаги Молиявий мониторинг бўйича федерал хизмат мамлакатнинг собиқ бош вазири Михаил Касьяновни ўзининг “террорчилар ва экстремистлар” рўйхатига киритди. Бу ҳақда идоранинг расмий сайтида хабар берилди.

Рўйхатга иқтисодчи Сергей Гуриев ва “Новая Газета Европа” бош муҳаррири Кирилл Мартинов ҳам киритилган. Қонунчиликка кўра, мазкур рўйхатга тушган шахсларнинг банк ҳисоблари блокланиши ва уларга хизмат кўрсатиш тўхтатилиши керак.

Касьянов, Гуриев ва Мартинов “хорижий агент” деб эълон қилинган, хорижда яшайди ва Россия аксилуруш қўмитаси таркибига киради. Жорий йилнинг 14 октябрь куни Россия Федерацияси Федерал хавфсизлик хизмати (ФХХ) қўмита аъзоларига нисбатан “ҳокимиятни зўрлик билан эгаллаш” ва “террористик ҳамжамият ташкил этиш” моддаларига биноан жиноят иши очган. Украина уруши бошланганидан кейин ташкил этилган мазкур қўмита Россияда “ножўя ташкилот” деб топилган. ФХХ уни давлат тўнтариши ва “конституцион тузумни ўзгартириш”га уринишда айбламоқда.

Маълумот учун, Михаил Касьянов 2000 йил майидан 2004 йил февралигача Владимир Путин президентлиги даврида Россия ҳукуматини бошқарган, ундан аввал эса Молия вазирлигини бошқарган. 2010 йилда у Борис Немцов, Владимир Рижков ва Владимир Милов билан бирга “Ўзбошимчилик ва коррупциясиз Россия учун” коалициясини тузган. Бу ҳаракат кейинчалик “Халқ эркинлиги партияси”га айланган, у 2023 йил май ойида Олий суд қарори билан тугатилган.

Яқинда “террорчилар ва экстремистлар” рўйхатига Россия аксилуруш қўмитасининг яна уч аъзоси – сиёсатшунос Екатерина Шульман, тадбиркорлар Борис Зимин ва Михаил Кокорич киритилган. ФХХнинг жиноят иши бўйича маълумотида жами 22 киши ва “бошқа номаълум шахслар” тилга олинган. Хавфсизлик хизматига кўра, қўмита ташкилотчилари “Украинанинг қуролланган миллатчи бўлинмаларини” молиялаштиради, у ерга одамларни “ёллайди” ва ўз мақсади сифатида Россиядаги амалдаги ҳокимиятни “йўқ қилишни” кўзлайди. 

Аксилуруш қўмитаси эса ўз сайтида улар Кремль бошлаган урушга қарши чиққан одамларга ёрдам кўрсатиш билан шуғулланишини билдирган.