“Коля Қирғиз” жиноий гуруҳига алоқадор ер давлатга қайтарилди

Қирғизистонлик марҳум криминал авторитет Қамчибек Кўлбоев (Қамчибек Асанбек)нинг уюшган жиноий гуруҳига алоқадор 80 гектар ер давлатга қайтарилди. Бу ҳақда “24.kg” хабар берди.

Уюшган жиноий гуруҳларни молиялаштириш ва жиноий фаолиятдан олинган даромадларни легаллаштиришга оид жиноят иши тергови доирасида тадбиркорлик субъектлари вакилларидан товламачилик билан шуғулланиш ҳолатлари аниқланди. Бу маблағлар Қамчибек Кўлбоевнинг уюшган жиноий гуруҳини янада молиялаштириш учун мўлжалланган эди.

Тергов-тезкор тадбирлари натижасида Чуй вилоятининг Иссиқ-Ота туманидаги 80 гектар ер давлат назоратига қайтарилди.

Маълумот учун, Қамчибек Асанбек Қирғизистон ва МДҲдаги энг нуфузли “ворзакон”лардан бири бўлган. Тахаллуси – “Коля Қирғиз”. У наркотик бизнеси, қурол-яроғ савдоси, товламачилик, қора кўчмас мулк, талончилик, автомашина ўғирлаш, бандитизм, “пул ювиш”, давлат мулкини ўғирлаш ва буюртма асосида қотиллик қилиш билан шуғулланган. У Қирғизистондаги миллионерлардан бири эди.

2020 йилдан бери Қирғизистон Миллий хавфсизлик давлат қўмитаси криминал авторитетни бир неча бор ҳибсга олган. 2023 йилнинг августида Қамчибек Кўлбоевга нисбатан жиноят иши даъво муддати ўтгани сабабли тугатилган. Криминал авторитет Қамчибек Асанбек Қозоғистонда трансмиллий жиноий ташкилот тузишда гумон қилинган. У 2023 йилнинг октябрь ойида Бишкекда ўлдирилди.

Эслатиб ўтамиз, аввалроқ қирғизистонлик марҳум криминал авторитет Қамчибек Кўлбоев (Қамчибек Асанбек)нинг уюшган жиноий гуруҳи собиқ аъзолари ушланганди.