Трамп ва Путин учрашуви қайси воқеадан кейин бекор қилингани айтилди

Москва Вашингтонга “Украинага нисбатан қаттиқ талабларини тасдиқловчи” ҳужжатни юборганидан сўнг, Қўшма Штатлар Президентлар Донаьлд Трамп ва Владимир Путиннинг Будапештда ўтказилиши режалаштирилган учрашувини бекор қилган. Бу ҳақда “Financial Times” манбаларга таяниб хабар берди.

Трамп ва Путин 16 октябрь куни телефон орқали мулоқот қилган, шундан сўнг Америка Президенти Россия Президенти билан Будапештда “икки ҳафта ичида” учрашишини маълум қилганди.

FT хабарига кўра, ушбу суҳбатдан бир неча кун ўтиб, Россия ТИВ Вашингтонга Москванинг Украинадаги можаронинг “асосий сабабларини” бартараф этиш талаби баён этилган меморандум юборган. Россия ҳукумати яна Киевдан ҳудудий имтиёзлар беришни, Украина Қуролли кучларини қисқартиришни ва Украина ҳеч қачон НАТОга қўшилмаслигини кафолатлашни талаб қилган. “Reuters” агентлигининг хабар беришича, Москва Вашингтонга унинг шартларини ўз ичига олган “норасмий ҳужжат” юборган. Ҳужжатда Россиянинг бутун Донбасс устидан назоратни қўлга киритиш талаби яна бир бор такрорланган ва Москва Украинага нисбатан ўзининг “максималистик талаблари”га амал қилиш қатъиятини таъкидлаган.

Шундан сўнг, АҚШ Давлат котиби Марко Рубио ва Россия Ташқи ишлар вазири Сергей Лавров ўртасида кескин телефон мулоқоти бўлиб ўтди. Суҳбатдан сўнг Рубио Трампга Москва музокаралар олиб боришга тайёр эмаслигини айтган. Бошқа манбага кўра, АҚШ Президенти Москванинг позициясидан “таъсирланмаган”.

Шунга қарамай, АҚШ расмий манбаларининг қайд этишича, Трамп Россия билан Украинадаги ҳарбий ҳаракатларни тўхтатиш бўйича келажакдаги музокаралар қандайдир тараққиётга олиб келадиган бўлса, очиқлигича қолмоқда.

Донаьлд Трамп 22 октябрь куни Путин билан бўлиб ўтадиган учрашувни бекор қилганини маълум қилди.

“Мен буни шунчаки тўғри деб ўйламаган эдим. Керак бўлган жойга етамиз деб ўйламагандим. Шунинг учун, мен буни бекор қилдим. Лекин биз учрашувни келажакда амалга оширамиз”, деди АҚШ Президенти.

Бир кун аввал у Путин билан “беҳуда учрашув” ўтказишни истамаслигини таъкидлаган эди.

Владимир Путин Трамп учрашувни бекор қилишдан кўра “кўпроқ уни кечиктириш ҳақида гапираётганини” айтди. Унинг қайд этишича, учрашувнинг ўзи ҳам, ўтказиладиган жой ҳам Америка томони томонидан таклиф қилинган.

“Мен бунга рози бўлдим, лекин айтдимки, бундай учрашувларга албатта пухта тайёргарлик кўриш керак. Энди кўряпманки, АҚШ Президенти бу учрашувни бекор қилиш ёки кейинга қолдиришга қарор қилган. Катта эҳтимол билан у уни кейинга қолдириш ҳақида гапиряпти. Нима дейиш мумкин? Ҳар қандай қарама-қаршилик, тортишув ёки айниқса, урушдан кўра мулоқот ҳар доим афзалдир”, деган Путин.

Эслатиб ўтамиз, аввалроқ Путин АҚШ Президенти Дональд Трамп билан Будапештда ўтказилиши режалашритилган учрашув бекор қилинмагани, аксинча, кейинроққа сурилганини айтганди.