Россия Украинага баллистик ракеталар билан зарба берди. Қурбонлар бор (видео)

Бугун, 25 октябрга ўтар кечаси Россиянинг Киевга баллистик ракеталар билан уюштирган ҳужуми оқибатида камида икки киши ҳалок бўлди, яна 12 киши жароҳат олди, улардан учтаси шифохонага ётқизилди. Бу ҳақда шаҳар мэри Виталий Кличко маълум қилди. 

Унинг сўзларига кўра, Дарница туманида икки ҳудуддаги нотураржойлар ҳудудида ёнғинлар чиққан. Днепровский туманида бир нечта уйларнинг ойналари ва эшиклари синиб, болалар боғчасининг биноси шикастланган. Деснянский туманида эса ракета парчалари тушганидан кейин омборхоналар ва бир неча автомобиллар ёниб кетган. Умуман олганда, Россия тунда тўққизта ракета учирган, шулардан тўрттаси уриб туширилган.

Россия шу кеча Украинадаги Днепропетровск вилоятини ҳам нишонга олган. Вилоят ҳарбий маъмурияти раҳбари Владислав Гайваненконинг билдиришича, Россия қўшинлари Синелниковский ва Павлоградский туманлари ҳамда Никопол шаҳрига ракета ва дронлар билан зарба берган. Ҳужумлар оқибатида икки киши ҳалок бўлган, яна етти киши яраланган. Фавқулодда вазиятлар давлат хизматига кўра, ҳалок бўлганлар орасида бир нафар аёл ва ёнғинни ўчириш чоғида қайта ҳужум остида қолган қутқарувчи Александр Егоричев ҳам бор.

Ҳужумлар оқибатида Днепропетровск вилоятининг бир неча туманларида ёнғинлар чиққан, кўп қаватли ва хусусий уйлар, хўжалик бинолари, гаражлар, дўконлар, автомобиллар ҳамда инфратузилма объектлари зарар кўрган.

Украина ҳаво кучлари маълумотига кўра, Россия Украина бўйлаб тўққизта “Искандер-М” баллистик ракетаси ва 62 та дрон учирган. Шулардан тўртта ракета ва 50 та дрон уриб туширилган. Украина Президенти Владимир Зеленскийнинг маълум қилишича, 2025 йил бошидан бери Россия қўшинлари Украинага қарийб 770 та баллистик ракета ва 50 дан ортиқ “Кинжал” ракетасини учирган.

Эслатиб ўтамиз, аввалроқ ҳам Россия кучлари Украинага яна кенг кўламли дрон ҳужумларини уюштирганди. Ҳужум оқибатида пойтахт Киевда икки киши ҳалок бўлган, 17 киши жароҳат олган. Ҳалок бўлганлардан бири бири Днепровск туманидаги кўп қаватли уйлардан бирида юзага келган ёнғин оқибатида вафот этган.