“Аср ўғрилиги”. Луврни тунаб кетганлар чет эллик бўлиши мумкин

19 октябрь куни Франциянинг машҳур Лувр музейида йирик ўғирлик содир бўлганди. Жиноятни  жуда тажрибали жамоа содир этган. Улар чет эллик бўлиши ҳам мумкин. Бу ҳақда Франция Ички ишлар вазири Лоран Нуньес маълум қилди.

Қайд этилишича, полиция саккизта экспонатни ўғирлаб, скутерларда қочиб кетган тўрт ўғрини қидирмоқда. Прокуратура ва Франция Президенти Эммануэль Макрон тергов муваффақиятли якунланишига ишонмоқда.

Ички ишлар вазирининг айтишича, тўрт эркак Луврнинг Аполлон галереясида жойлаштирилган қимматбаҳо тақинчоқларни ўғирлаш учун олдиндан ҳаракат қилган. Улар юзларини беркитувчи ниқоб кийган бўлиб, тезкор скутерларда жиноят содир этилган жойни тарк этган. 

Дастлабки маълумотларга кўра, жиноятчилар юк кўтарувчи лифт орқали деразани синдириб, тўғридан тўғри Аполлон галереясининг биринчи қаватдаги зарур бўлимига кирган. Вазирнинг таъкидлашича, бутун операция тахминан етти дақиқа давом этган.

BFM телеканали жиноятчилардан бири сариқ кийимда шишали витриналардан бирини бузаётгани акс этган видеони эълон қилди. Ушбу кийим ва скутерларнинг бири кейинчалик полиция томонидан топилган.

Ўғрилар Наполеон ва Жозефина коллекциясидан саккизта буюмни – маржон, брош ва диадемани ўғирлаган. Тўққизинчи экспонат – қимматбаҳо тошлар билан безатилган тож воқеа жойидан топилган. Париж Бош прокурори музей яқин кунларда ўғирланган буюмларни қайтариб олишига шубҳа йўқлигини билдирган. Унинг сўзларига кўра, иш устида 60 га яқин терговчи ишламоқда.

Франция Президенти Эммануэль Макрон Луврнинг талон-торож қилинишини “қадрлайдиган меросга ҳужум” деб атаган.

“Биз экспонатларни қайтарамиз ва жиноятчилар жавобгарликка тортилади. Бу борада Париж прокуратураси раҳбарлигида барча чоралар кўрилмоқда”, деган прокурор. 

Экспертлар бу ҳодисани “сўнгги йилларда Европадаги энг катта санъат ўғрилиги”, “Санъатдаги аср ўғрилиги” дея баҳоламоқда.

Маълумот учун, Лувр – дунёдаги энг машҳур музей бўлиб, ҳар йили 9 миллиондан ортиқ ташриф буюрувчини қабул қилади.

Аполлон галереясида музейнинг энг қимматли тарихий коллекциялари сақланади. У 2020 йил 15 январь куни экспозиция қайта ташкил қилингач, қайта очилган эди.