“Реал Мадрид” Президенти Исроилнинг Фаластинда босиб олган ерларида яҳудийлар учун уй-жой қуряптими?

Бирлашган Миллатлар Ташкилоти “Реал Мадрид” президенти Флорентино Пересга тегишли қурилиш компанияларини Исроилнинг ноқонуний аҳоли пунктларини қуришда иштирок этгани учун қора рўйхатга киритди. Бу ҳақда “elPeriodico” хабар берди.

Нашрнинг ёзишича, БМТнинг қора рўйхатига ACS (Actividades de Construcción y Servicios, S.A.) ва унинг шўба корхонаси SEMI киритилган. Бу қарор Перес учун ноқулай вақтда қабул қилинган, чунки унинг мамлакати ва футбол жамоатчилиги Ғазодаги уруш, геноцид ва Исроил армиясининг ҳар куни оддий фуқароларнинг ўлимига сабаб бўлаётган ҳаракатларини тобора кўпроқ танқид қилмоқда.

ACS – муҳандислик, қурилиш ва инфратузилма лойиҳаларини ишлаб чиқиш, қуриш ва бошқариш билан шуғулланадиган йирик халқаро компания. SEMI (Sociedad Española de Montajes Industriales, S.A.) эса саноат ва электр соҳасида фаолият юритувчи корхона ҳисобланади.

Умумий ҳисобда БМТнинг қора рўйхатида 158 та компания бор. Улардан 70 таси, жумладан, Пересга тегишлилари ҳам босиб олинган ҳудудларда олиб борилган мустақил халқаро тергов натижасида қўшилган.

БМТ қора рўйхатга киритилган компанияларни “аҳоли пунктларини қуриш ва сақлашни осонлаштириш, фаластинликларнинг уй ва мулкларини бузиш, кузатув фаолиятини амалга ошириш, табиий ресурслардан тижорат мақсадида фойдаланиш ҳамда ифлосланиш ва чиқиндиларни ташлаш”да айбламоқда. Тахминан 700 минг кўчманчи исроиллик Ғарбий Соҳил ва Шарқий Қуддусда жойлашган камида 250 та ноқонуний аҳоли пунктида яшамоқда.

Хабарларга кўра, ACS Фаластин ёки Исроилда ҳеч қандай шартномаси йўқлигини билдирган, бироқ бу борада расмий баёнот бермаган. Бироқ компания ўзининг қора рўйхатда тилга олиниш сабабини SEMI шўбасини Франциянинг Vinci компаниясига сотилиши билан изоҳлаган.

Қайд этиш жоиз, “Реал Мадрид” Ғазодаги Исроил ҳарбий ҳаракатларини очиқ қораламаган Испаниядаги кам сонли клублардан бири бўлиб, яқинда “Осасуна” мухлислари “Реал Мадрид”га қарши ўйинда “Исроилга қизил карточка беринг” деган баннер кўтарган эди.

Эслатиб ўтамиз, аввалроқ Испания Бош вазири Педро Санчес Ғазода давом этаётган можаро сабабли Исроилни халқаро спорт мусобақаларидан четлатишга чақирган эди. Шунингдек, Испания Конгресси аъзоси Патхи Лопес агар Исроил терма жамоаси саралашдан ўтса, Испания 2026 йилги Жаҳон чемпионатида қатнашмаслиги мумкинлигини айтганди.