Tramp va uning oila a’zolarining boyligi ikki baravar oshdi

Donald Tramp AQSH Prezidenti lavozimini egallaganidan beri uning oilasining boyligi deyarli ikki baravar oshdi. Bu haqda “Forbes” xabar berdi.

Ma’lumotlarga ko‘ra, mutlaq ko‘rsatkichlarda eng katta o‘sish AQSH Prezidenti va birinchi xonimda bo‘lgan. Ularning sof boyligi o‘tgan yil davomida 3 milliard dollarga oshib, 7,3 milliard dollarga yetdi, bu 70 foizga o‘sishdir. Tramp o‘zining kriptovalyuta biznesidan – World Liberty Financial blokcheyn-platformasi va Trump mem tangasidan 2 milliard dollarga yaqin daromad oldi. Yana 400 million dollar uning nomidan foydalanish uchun xalqaro litsenziya shartnomalaridan kelib tushgan. Qolganlari birinchi xonim Melaniyaning xotiralari va nutqlaridan olingan royalti, shuningdek, uning kriptotokenidan kelgan daromaddan tushgan.

Tramp “Forbes” jurnalining dunyoning eng boy odamlari ro‘yxatida 118 pog‘onaga ko‘tarilib, 201-o‘ringa yetdi.

Trampning qizi Ivanka va uning turmush o‘rtog‘i otasining 2024 yilgi saylovdagi g‘alabasidan keyin biznes daromadlari va ko‘chmas mulk qiymatining o‘sishi tufayli taxminan 100 million dollarga boyidi.

Prezidentning o‘g‘li Erik ham 40 million dollarga boy bo‘ldi. Uning boyligi hozirda 750 million dollarga baholanmoqda. U, shuningdek, kriptobiznes orqali pul ishlab topadi. U GrabAGun onlayn qurol do‘koni va Truth Social ijtimoiy tarmog‘ining hammuallifi kichik Donald Tramp bilan birga American Bitcoin’ni boshqaradi. Donning boyligi o‘tgan yildan beri 50 million dollarga oshgan.

Trampning kenja o‘g‘li, Nyu-York universitetining 19 yoshli talabasi Barron otasining World Liberty Financial platformasini yaratishda yordam bergan. O‘shandan beri u kriptotokenlarini sotish orqali 80 million dollar ishlab oldi. Barron shuningdek, agar sotilsa, unga 525 million dollar daromad keltirishi mumkin bo‘lgan tokenlarga ega.

Nashrning yozishicha, hozirda Tramplarning umumiy boyligi 10 milliard dollarni tashkil etadi, bu ularni 2024 yilda, ikkinchi prezidentlik muddatidan oldin bo‘lgan boylikdan qariyb ikki barobarga boy qiladi.