Украинада Исроил берган Patriot тизими жойлаштирилган – Зеленский

Украина Президенти Владимир Зеленский мамлакат қуролли кучларига Исроил томонидан етказилган Patriot ҳаво ҳужумидан мудофаа тизими жойлаштирилганини маълум қилди. Бу ҳақда у бугун, 27 сентябрь куни журналистлар билан бўлган брифингда сўз очди.

Зеленскийга кўра, бу комплекс Украинада бир ойдан бери ишламоқда. Шунингдек, Украина Президенти жорий йил кузда Германиядан яна икки дона Patriot тизими келишини айтди.

“Бир ойдан бери Исроил комплекси Украинада ишлаяпти. Кузда яна иккита Patriot тизимини оламиз”, дейди у.

Зеленский шунингдек, матбуот анжуманида агар Россия Украинани электрсиз қолдиришга уринса, Киев Россия энергетика объектларига жавоб зарбалари бериши ҳақида огоҳлантирган. Унинг сўзларига кўра, “маданиятли давлатлар ҳеч қачон биринчи бўлиб ҳужум қилмайди ва тажовузкор бўлмайди, бироқ бу уларнинг кучсизлигини англатмайди”.

Маълумот учун, жорий йилнинг июнь ойида Исроилнинг Украинадаги элчиси Михаэль Бродский Киевга АҚШдан олинган ва 1990 йилларнинг бошларида Исроилда хизматда бўлган Patriot қурилмалари топширилганини билдирган. У “Исроил ҳарбий жиҳатдан ёрдам бермаган” деган фикрни рад этган. Кейинчалик Исроил Ташқи ишлар вазирлиги бу сўзларни инкор этиб, элчи баёнотлари ҳақиқатга тўғри келмаслигини маълум қилган. Шундан сўнг, Россия ҳам Исроилдан изоҳ талаб қилган.

Patriot – бу АҚШнинг Raytheon компанияси томонидан ишлаб чиқилган ўрта масофали зенит-ракета мажмуаси бўлиб, у самолётлар, қанотли ва баллистик ракеталарни уриб тушириш учун хизмат қилади. Комплекс таркибига бошқарув пункти, радар, йўналтириш станциялари ва учириш қурилмалари киради.