Россияда хотинига сохта ҳужжат тайёрлаган ўзбекистонлик қамалди

Россиянинг Сиктивкар шаҳрида ўзбекистонлик эркак хотинининг Россияда ноқонуний қолишини ташкил қилгани учун қамоқ жазосига ҳукм қилинди. Бу ҳақда “Комиинформ” хабар берди.

Суд материалларига кўра, эркак ўтган йилнинг 6 сентябридан 26 декабригача, яъни Россия ҳудудида бўлган вақтида Ўзбекистон фуқароси бўлган хотинининг мамлакатда ноқонуний қолишини бошқа шахслар билан тил бириктирган ҳолда ташкил қилган. У аёлнинг Россияда қонуний бўлиб тургандек кўрсатиш учун сохта меҳнат патентлари ва бошқа расмий ҳужжатларни сотиб олган.

Ушбу қалбаки ҳужжатларни миграция хизмати ходимларига тақдим қилган, бироқ мутахассислар сохталик аломатларини аниқлаган. Оқибатда жиноят иши қўзғатилган ва айбланувчининг хотини депортация қилинган.

Суд жараёнида эркак ўзига қўйилган айбловни тўлиқ тан олган. Бугун, 26 сентябрь куни чиқарилган ҳукмга кўра, эркак қалбаки ҳужжатларни сотиб олиш ва сақлаш, шунингдек, гуруҳ бўлиб тил бириктирган ҳолда сохта ҳужжатлар ва интернетдан фойдаланиб ноқонуний миграцияни ташкил этишда айбли деб топилган.

Унга 1 йил-у 6 ой муддатга озодликдан маҳрум қилиш жазоси тайинланган. Ҳукм ҳали қонуний кучга кирмаган.

Эслатиб ўтамиз, аввалроқ Россиянинг Санкт-Петербург шаҳрида беш нафар Ўзбекистон фуқароси ҳибсга олинганди. Ҳибсга олинганларнинг ёши 22 дан 40 ёшгача бўлиб, улар Греческий тураржой ҳудудида юз берган оммавий муштлашувда иштирок этган.