Қирғизистоннинг энг гўзал қизи аниқланди (видео)

Кеча, 24 сентябрь куни Қирғизистон пойтахти Бишкекда “Мисс Қирғизистон” миллий гўзаллик танловининг финали бўлиб ўтди. Унда мамлакатнинг энг чиройли ва иқтидорли қизлари иштирок этган. Бу ҳақда “24.kg” хабар берди.

Нашрнинг ёзишича, “Мисс Қирғизистон – 2025” унвонига Аяна Расул қизи сазовор бўлган. У бу ғалабани катта шараф ва масъулият деб атаб, тож билан бирга 200 минг сомлик (тахминан 28 млн сўм) сертификатни ҳам қўлга киритган.

“Аёлларимиз ўзига ишониши керак. Меҳнат, қатъият ва ватанга бўлган муҳаббат доим ғалабага олиб келади”, дейди Аяна натижалар эълон қилингач.

Шунингдек, ҳакамлар ҳайъати яна уч иштирокчига Гран-при тақдим этган:

• Анора Эсонгалдиева “Miss Kyrgyzstan Universe” унвонини олиб, “Miss Universe” танловида Қирғизистон шарафини ҳимоя қилади;
• Мадина Эрмекова “Miss Kyrgyzstan Grand International” бўлиб, “Miss Grand International” саҳнасида қатнашади;
• Сюзанна Уметова эса “Miss Kyrgyzstan International” унвонини олиб, “Miss International” танловига йўлланма олган.

Маълумот учун, Аяна машҳур қўшиқчи Айгерим Расул қизининг синглиси ва Қирғизистон халқ артисти Расул Маматқуловнинг қизи ҳисобланади.

Эслатиб ўтамиз, аввалроқ Россияда турмуш қурган аёллар ўртасида 25-умумроссия гўзаллик танлови – “Миссис Россия – 2025” ўтказилиб, ушбу унвонга Магнитогорскда яшовчи 37 ёшли Екатерина Семенова сазовор бўлганди.