Трампнинг қудаси Макронни тандиқ қилди. Париж эса уни ТИВга чақиртирди

АҚШнинг Франциядаги элчиси, АҚШ Президенти Дональд Трампнинг қудаси Чарльз Кушнер очиқ хат орқали Президент Эммануэль Макронга Францияда антисемитизмнинг кучайиши ва “ҳукумат томонидан унга қарши етарли чоралар кўрилмаётгани” ҳақида ташвиш билдирди. Унинг очиқ хати “The Wall Street Journal”да эълон қилинди.

Исроилнинг Францияни танқид қилганидан сўнг, миллати яҳудий бўлган Кушнер Ғазо уруши бошлангандан бери Францияда яҳудийларга нисбатан нафрат кучайганини таъкидлади. АҚШ элчиси Президент Макронни Исроилга нисбатан танқидни юмшатишга чақирди ва “француз ҳаётини узоқ вақтдан бери соя қилиб келаётган” антисемитизм мисолларини келтирди. Дипломатнинг таъкидлашича, “Францияда яҳудийлар кўчада ҳужумга учрамайдиган, синагогалар ва мактаблар бузилмайдиган ёки яҳудийларга тегишли корхоналар вандализмдан жабр чекмайдиган бирор кун йўқ”.

“Исроилни ҳақорат қиладиган баёнотлар ва Фаластин давлатини тан олиш ҳаракатлари экстремистларни руҳлантиради, зўравонликни кучайтиради ва Франциядаги яҳудийлар ҳаётини хавф остига қўяди”, деб ёзади Кушнер.

Элчи, шунингдек, француз мактаблари ўқув дастурлари ҳақида ҳам ташвиш билдириб, “ёш французларнинг деярли ярми Холокост ҳақида ҳеч қачон эшитмаганини айтиб ўтди”.

“Сизнинг Ички ишлар вазирлигингиз ҳатто мактабгача таълим муассасаларида ҳам антисемитизм ҳолатлари қайд этилгани ҳақида хабар берган”, дейилади Кушнернинг Франция Президентига йўллаган мактубида.

У, шунингдек, Макрон ва бошқа француз раҳбарлари билан “муаммони ҳал қилиш учун жиддий режа ишлаб чиқиш” устида ҳамкорлик қилишга тайёрлигини билдирди.

Франция Ташқи ишлар вазирлиги бугун, 25 август куни АҚШ элчисини чақириб, унинг баёнотлари 1961 йилги Вена конвенциясини бузганини айтди, чунки у конвенция элчиларга давлатларнинг ички ишларига аралашишни тақиқлайди.

“Элчининг айбловлари мақбул эмас”, деди француз ташқи сиёсий идораси вакили.

Кушнернинг хати Исроил Бош вазири Биньямин Нетаньяҳунинг ўтган ҳафтада Макронга йўллаган мактуби билан уйғун келади. Унда у француз раҳбарини Фаластин давлатини халқаро тан олиш чақириқлари орқали антисемитизмни қўзғатишда айблаган эди.

Франция сентябрда расман Фаластин давлатини тан олишни режалаштирмоқда. Франция Фаластин давлатини тан олишга қарор қилди. Исроил эса буни “терроризм учун мукофот” деб атади.

Фаластин давлатини тан олиш режаларини эълон қилиб, Макрон шундай деганди: 

“Биз Фаластин давлатини қуришимиз, унинг барқарорлигини таъминлашимиз ва у ўзининг демилитаризациясини қабул қилиб, Исроилни тўлиқ тан олгандан сўнг, бутун Яқин Шарқ хавфсизлигига ҳисса қўшишига кафолат беришимиз шарт. Бошқа йўл йўқ”.

Аввалроқ Францияда Ғазо можароси билан боғлиқ антисемитизм ҳолатлари муносабати билан синагогалар ва бошқа яҳудий марказларини ҳимоя қилиш учун хавфсизлик чоралари кучайтирилган эди.

Уруш 2023 йил 7 октябрда ҲАМАСнинг Исроил жанубига ҳужуми билан бошланган. Унинг оқибатида тахминан 1200 киши ҳалок бўлган ва 251 киши гаровга олинган.

Жавоб тариқасида Исроил ҳужум бошлади ва Ғазо секторида 60 мингдан ортиқ киши ҳалок бўлди.

22 август куни Ғазо шаҳри ва унинг атрофида Бирлашган Миллатлар Ташкилоти очарчилик сифатида баҳолайдиган ҳолатлар илк бор тасдиқланди. Исроил эса Ғазода очарчилик мавжудлигини рад этиб, IPC халқаро ташкилотининг хулосаларини “ҲАМАС тақдим этган тўлиқ бўлмаган ва бирёқлама маълумотларга асосланган” деб атади.