Трамп мигрантларга қарши туриш учун чегара деворини бўятяпти

АҚШ Президенти Дональд Трамп Мексика билан чегарадаги деворни қора рангга бўяшни хоҳлашини маълум қилди. Бу ҳақда АҚШ Ички хавфсизлик вазири Кристи Ноэмга таяниб, “The Hill” хабар берди.

Ноэмнинг сўзларига кўра, ишчилар аллақачон деворнинг айрим қисмларини қора рангга бўяшни бошлаган. У бу буйруқ бевосита Трамп томонидан берилганини қўшимча қилган. Президентнинг фикрича, қора рангли девор қуёш таъсирида жуда қизиб кетади ва бу мигрантларнинг деворга чиқиш истагини камайтиради. 

“Биз бутун чегара деворини қора рангга бўяшни режалаштиряпмиз”, деган вазир. 

Қайд этилишича, Ноэмнинг ўзи ҳам шахсан чегарага бориб, деворни қора рангга бўяш ишларига қўшилган. Ноэмнинг ташрифи АҚШ жанубий чегарасида қўлга олишлар сони камайган бир пайтга тўғри келган. 

Нашрнинг эслатишича, Трамп деворни қора рангга бўяш ғоясини ўзининг биринчи президентлик муддати давридаёқ илгари сурган эди.

Эслатиб ўтамиз, АҚШ Президенти Дональд Трамп жорий йилнинг бошида мамлакатдаги ноқонуний мигрантларга қарши курашни бошлагач, уларнинг сони деярли бир миллионга камайгани ҳақида хабар берилганди.