Нью-Орлеаннинг биринчи аёл мэри 100 йилдан ортиқ муддатга қамалиши мумкин

north_east

Байроқ ортидаги битим: Нью-Йорк мэри билан “отамлашган” ўзбекистонлик ким?

АҚШ федерал прокурорлари Нью-Орлеан (Луизиана штати) шаҳрининг биринчи аёл мэри Латойе Кантреллга 11 та модда, жумладан, фирибгарлик ва адолатга тўсқинлик қилиш бўйича айблов эълон қилди. Бу ҳақда жорий йилнинг 15 август куни Қўшма Штатлар прокуратураси матбуот хизмати хабар берди.

Сиёсатчи билан судда унинг қўриқчиси ҳам иштирок этади, сабаби у билан яширин алоқаси борлиги ишнинг асосини ташкил қилади.

АҚШнинг Луизиана шарқий округи прокуратурасига кўра, Кантрелл ўзига тайинланган полиция ходими Жеффри Вэппи билан “шахсий ва яқин” муносабатда бўлиб, 2021 йилдан бошлаб у билан бирга вақт ўтказиш учун Қўшма Штатлар ва хорижга 14 марта саёҳат қилган. Тергов маълумотларига кўра, у ва Вэппининг парвозлари солиқ тўловчининг пулига камида 70 минг долларга тушади.

2022 йилда шундай саёҳатлардан бирида уларнинг иккаласи иш вақтида давлат пулига вино сотиб олиб, уни ичаётган пайтда ушланган. Тергов маълумотларига кўра, полиция бошлиғи қўриқчини Кантрелл билан ишлашдан четлатишга уринган, бироқ мэр уни қайта тиклашни талаб қилган. У, шунингдек, ушбу махфий учрашувлардан бирининг фотосуратларини жойлаштирган шахс устидан ҳуқуқни муҳофаза қилиш органларига шикоят қилган.

Прокуратурага кўра, фирибгарлик схемасини яшириш учун Кантрелл ва Вэппи WhatsApp’да 15 мингдан ортиқ шифрланган хабарлар алмашган, далилларни яширишга уринган, ФҚБга ёлғон баёнотлар берган ва бир қатор ёлғон баёнотларни ўз ичига олган ҳужжатни катта ҳакамлар ҳайъатига тақдим этган.

53 ёшли сиёсатчи олтита фирибгарликнинг ҳар бири учун 20 йилга озодликдан маҳрум этилиши мумкин. Кантреллдан бир ёш кичик Вэппи эса шундай жиноий ишлар бўйича 12 та ҳолатда айбланмоқда. Шунингдек, у адолатга тўсқинлик қилгани ва бунинг учун фитна уюштиргани учун энг юқори жазога дуч келиши мумкин. Ҳибсга олинганлар ҳақида хабар берилмаган.

Маълумот учун, Кантрелл, демократ, 2018 йилда мэрлик лавозимида ғолиб чиққан ва 2021 йилда қайта сайланган. Муддати чеклангани сабабли у яна номзодини қўйиши тақиқланган ва 2025 йил кузда бўлиб ўтадиган сайловдан кейин ўз лавозимини тарк этади. У ҳали муддатидан олдин истеъфога чиқиш режасини эълон қилмаган.

Эслатиб ўтамиз, Америка Қўшма Штатларининг Нью-Йорк шаҳри мэри Эрик Адамс 2024 йилнинг сентябрь ойи охирларида пора олиш ва ўз сайловолди кампаниясига чет элдан ноқонуний хайрия сўрашда айбланганди. У замонавий тарихда жиноий ишда айбланган биринчи Нью-Йорк мэридир. QALAMPIR.UZ унинг жиноят иши бўйича шакллантирилган 57 саҳифадан иборат айблов хулосаси билан танишиб чиққан эди.