Зеленский Оқ уйга боришдан олдин Трампнинг одами билан учрашди (видео)

Украина Президенти Владимир Зеленский бугун, 18 август куни Вашингтонда АҚШ Президентининг Украина бўйича махсус вакили Кит Келлогг билан учрашди. Бу ҳақда у ўзининг Telegram-каналида маълум қилди.

Украина раҳбарининг маълум қилишича, улар фронтдаги вазият ва дипломатик келишувни муҳокама қилган.

“Биз Америка билан жанг майдонидаги вазиятни, кучли дипломатик имкониятларимизни – Украина ва бутун Европани муҳокама қилдик. Россияни фақат куч билан тинчликка мажбурлаш мумкин, Президент Трамп эса шундай кучга эга. Биз ҳақиқатан ҳам тинчлик бўлиши учун ҳамма нарсани тўғри қилишимиз керак”, деб ёзди Украина раҳбари.

Қайд этиш жоиз, Келлогг АҚШ ва Россия Президентлари Дональд Трамп ва Владимир Путиннинг Анкориждаги (Аляска) саммитида иштирок этмаган.

Зеленский Трамп Украина ва бошқа Европа давлатларини Вашингтонга таклиф қилганини эслатди.

“Учрашув биринчи марта бундай форматда ўтказилмоқда – жуда жиддий. Европада бир киши учун тинчлик ҳақида гап кетганда, бу Европадаги барчага тегишли. Биз урушни тугатиш ва хавфсизликни ишончли кафолатлаш учун имкон қадар самарали ишлашни давом эттиришга тайёрмиз” деди Украина Президенти.

Зеленский 18 августга ўтар кечаси Россия Қуролли кучлари Украина шаҳарларига ҳужумларини давом эттирганини таъкидлади. 

“Укринформ” нашрининг ёзишича, учрашув Ҳай-Адамс меҳмонхонасида бўлиб ўтган. У Оқ уйдан бир неча дақиқалик масофасида жойлашган.

Келлогг, ўз навбатида, у аллақачон Вашингтонга етиб борган НАТО раҳбари билан ҳам гаплашганини маълум қилди.

“Президент Зеленскийнинг бугун АҚШ Президенти билан учрашуви олдидан НАТО Бош котиби Марк Рутте, АҚШнинг НАТОдаги доимий вакили Мэтью Уитакер ва жамоамиз билан ажойиб суҳбат”, деб ёзди Трампнинг Украина бўйича махсус вакили Х ижтимоий тармоғида.

Оқ уй хабарига кўра, Трамп ва Зеленскийнинг икки томонлама учрашуви бугун, 18 август куни Тошкент вақти билан соат 22:15да бошланади. Кейин Тошкент вақти билан 23:15 да АҚШ Президенти Европа етакчиларини қарши олади. Дональд Трампнинг европалик сиёсатчилар билан музокаралари Тошкеент вақти билан соат 00:00да бошланади.

Музокараларда Германия канцлери Фридрих Мерц, Буюк Британия Бош вазири Кир Стармер, Италия Бош вазири Жоржия Мелони, Финляндия ва Франция Президентлари Александр Стубб ва Эммануэль Макрон, шунингдек, НАТО Бош котиби Марк Рютте ва Европа комиссияси раҳбари Урсула фон дер Ляйен иштирок этиши кутилмоқда. АҚШ Давлат котиби Марко Рубио таъкидлаганидек, Европа етакчилари, Украина Президенти ва Трамп, хусусан, Киев учун хавфсизлик кафолатларини муҳокама қилади.