Украиналиклар 3-кун Киевда намойиш ўтказди

Кеча, 24 июль куни Украина пойтахтида аввалроқ Олий Рада томонидан қабул қилинган Коррупцияга қарши курашиш миллий бюроси (НАБУ) ва ихтисослаштирилган антикоррупция прокуратураси (САП) мустақиллигини сезиларли даражада чекловчи қонунга қарши намойишлар учинчи кун давом этди. Соат 21:00 ҳолатига кўра, Киев марказидаги Иван Франко театри ёнидаги майдонга икки мингга яқин одам тўпланган. Бу ҳақда “Deutsche Welle” хабар берди.

Кеча Олий Радада коррупцияга қарши кураш идораларининг мустақиллигини тиклашга қаратилган иккита қонун лойиҳаси рўйхатга олинганига қарамай, намойишлар давом этди. Қонун лойиҳаларидан бирини бир гуруҳ депутатлар, иккинчисини Украина Президенти Владимир Зеленский таништирган.

“Deutsche Welle” мухбирининг хабар беришича, намойишчилар Украина мадҳиясини куйлаб, “Украина Қуролли Кучларига шон-шуҳрат”, “Куч миллионерларга эмас, миллионларга”, “Қўл НАБУ ва САПдан” каби шиорларни айтишган. Шунингдек, армияга ёрдам беришга эътибор қаратишга чақириқлар бўлган.

“Veteran.UA” жамоат ташкилоти раҳбари Иван Чигирин маълум қилишича, намойишлар нафақат НАБУ ва САПни ҳимоя қилишга қаратилган, балки Украина жамиятининг адолат талаби ҳамдир.

“Мен учун ҳозир мамлакатдаги асосий муаммо – бу НАБУ эмас, балки Россиянинг кенг кўламли бостириб кириши, коррупция ва бошқалар ... Давлат ўзи бажариши шарт бўлган нарсани қилиши керак, бу эса уруш”, дейди ҳарбий хизматчи Игорь Тиш.

Киевдаги намойишларнинг учинчи куни кечки пайт уларда икки мингга яқин одам қатнашди. “Украина талабалари озодлик учун” жамоат ташкилоти президенти Николай Бескровний “Deutsche Welle” билан суҳбатда иккита янги қонун лойиҳаси НАБУ ва САП фаолиятининг асосий тамойилларини тиклаганидан мамнунлигини билдирди.

“Биз давлат тўнтаришини ёқламаймиз (...) Биз Украинанинг қулаши ва унинг Россия билан урушда мағлуб бўлишини ёқламаймиз. Биз ҳукуматимиз қилган ишлардан бир қадам орқага чекиниш, коррупцияга қарши кураш идораларининг мустақиллигини сақлаб қолиш ва ғалаба учун ишлашда давом этиш тарафдоримиз”, дейди фаол.

Шу билан бирга, Бескровний украиналиклар Зеленский таклиф қилган янги қонун лойиҳаси кучга киргунга қадар норозилик билдиришга тайёрлигини таъкидлади.

Маълумот учун, 22 июль куни Украина Олий Радаси қонун лойиҳасига Коррупцияга қарши курашиш миллий бюроси ва коррупцияга қарши ихтисослаштирилган прокуратура мустақиллигини сезиларли даражада чекловчи тузатишларни иккинчи ўқишда қўллаб-қувватлади. Украина Президенти Владимир Зеленский шу куни қонунни имзолади. Кўп ўтмай, Киев, Одесса, Львов ва бошқа шаҳарларда қонунга вето қўйиш ва НАБУ ва САПни мустақилликдан маҳрум қилмаслик талаби билан намойишлар бошланди.

Кеча, 24 июль куни Зеленский Олий Радага Украинанинг икки антикоррупция агентлиги мустақиллигини тиклаш тўғрисидаги қонун лойиҳасини тақдим этди. НАБУ Зеленскийнинг ташаббусини олқишлади.

Европа Комиссияси ҳам Киевнинг қабул қилинган қонун атрофида юзага келган вазиятни тузатиш ниятини олқишлади, бироқ Еврокомиссия вакили Гийом Мерсьенинг айтишича, Брюссель ҳозирча Украина расмийларига тўғридан тўғри кўрсатма бермайди, улар коррупцияга қарши ислоҳотга путур етказиш билан таҳдид солаётган вазиятни қандай тузатиш ниятида эканликлари ҳақида батафсил тушунтириш беришларини кутади.