Ҳиндистондаги авиаҳалокатда 110 киши қурбон бўлди – ОАВ (видео)

Аввалроқ, Air India авиакомпаниясига тегишли йўловчи самолёт Ғарбий Ҳиндистонда ҳалокатга учрагани хабар қилинганди. Ушбу ҳодиса оқибатида 110 киши ҳалок бўлган. Бу ҳақда маҳаллий “TimesNow” нашри хабар берди.

Маълум бўлишича, Boeing 787-8 Dreamliner самолёти бортда 242 киши билан Аҳмадободдан Лондоннинг Гатвик аэропортига учаётган бўлган. Авиакомпания Х ижтимоий тармоғида берган баёнотида самолёт парвоздан сўнг ҳалокатга учраганини билдирган. Йўловчилар орасида 169 нафар Ҳиндистон фуқароси, 53 британиялик, 1 канадалик ва 7 португалиялик бўлган. Ҳалок бўлмаганлар яқин атрофдаги шифохоналарга олиб борилмоқда, аммо уларнинг сони ҳозирча очиқланмаган.

Аҳмадобод халқаро аэропорти ҳалокатдан сўнг вақтинча ёпилган.

“TimesNow”га кўра, самолёт ҳавога кўтарилгач дарҳол “фавқулодда сигнал” узатган. У максимал 190 метр баландликка чиққач, кескин пасая бошлаган. Ҳалокат сабаби ҳали аниқланмаган. Самолёт аэропорт ҳудудидан ташқарида қулаган.

Воқеа жойига тез ёрдам машиналари, ёнғин ўчириш хизмати, шунингдек, Миллий гвардия ва Чегара хавфсизлик кучлари етиб борган. 

Дастлабки маълумотларга кўра, бу Boeing 787-8 Dreamliner модели иштирокида рўй берган биринчи йирик авиаҳалокат ҳисобланади. 2024 йил апрель ойида АҚШнинг Федерал авиация бошқармаси Boeing 787 Dreamliner самолётлари корпус қисмларининг нотўғри бириктирилгани ҳақидаги шикоятлар ортидан тергов бошлаган ва барча авиаташувчиларга ушбу моделдаги самолётларни текширишни буюрган.

Эслатиб ўтамиз, ўтган йилнинг 25 декабрь куни Azerbaijan Airlines авиакомпаниясининг Баку-Грозний йўналишидаги самолёти ҳалокатга учраганди. Самолётда 62 нафар йўловчи ва беш нафар экипаж аъзоси бўлган. Самолёт қулашида 38 киши ҳалок бўлди, 29 киши омон қолди.