Россияда ўлим жазоси амалиётга қайтарилиши мумкин

Россияда террорчиларга нисбатан ўлим жазосини жорий этиш таклиф қилинмоқда. Бу ҳақда “Справедливая Россия – За правду” партияси раҳбари Сергей Миронов ТАСС’га берган интервьюсида сўз очди.

Мироновнинг таъкидлашича, террорчилар учун адолатли жазо фақат ўлим бўлиши мумкин. Уларнинг фракцияси бир неча бор террорчилар ва уларнинг ҳамкорларига нисбатан ўлим жазосини қайта тиклашни талаб қилган ва бу масалада курашни давом эттиради.

“Террорчилик ҳаракатларига қўл урганларга нисбатан гуманистик ёндашувни тўхтатиш керак”, деган Миронов.

Россия Конституциявий суди раиси Валерий Зоркин ўлим жазоси Россияда фақат янги Конституция қабул қилинса, қайта жорий этилиши мумкинлигини, бошқа йўл мавжуд эмаслигини билдирган эди.

Маълумот учун, Россияда ўлим жазоси 1997 йил 16 апрелдан бери қўлланилмайди. Бу Россия Федерацияси томонидан ўлим жазосини бекор қилиш билан боғлиқ инсон ҳуқуқлари ва асосий эркинликларини ҳимоя қилиш тўғрисидаги Страсбург Конвенциясининг 6-сонли протоколи имзоланиши билан боғлиқ. Аммо ўлим жазоси жазо тури сифатида Россия Жиноят кодексининг 59-моддасида мустаҳкамланган. У фақат ҳаётга тажовуз қиладиган ўта оғир жиноятлар учун қўлланилиши мумкин. Шундай қилиб, Россияда 1997 йилдан буён амалда ўлим жазоси қўлланилмаган, лекин қонунчиликда бу жазо тури ҳалигача сақланиб турибди.

Эслатиб ўтамиз, жорий йилнинг 17 апрель куни Россия Олий суди Бош прокурорнинг Россияда “Толибон” ҳаракати фаолиятини тақиқлашни тўхтатиб туриш ҳақидаги маъмурий даъвосини қаноатлантирганди. Ҳужжат 2024 йил декабрида кучга кирган, террорчилик рўйхатига киритилган ташкилотлар фаолиятини тақиқлашни вақтинчалик тўхтатиб туриш имконини берувчи ҳуқуқий норма бўйича қабул қилинган биринчи қарор бўлган.