КХДР ҳам АҚШнинг “Олтин гумбаз” лойиҳасидан чўчияпти

Корея Халқ Демократик Республикаси (КХДР) АҚШнинг янги “Олтин гумбаз” (Golden Dome) номли ракетага қарши мудофаа тизими нафақат мудофаа, балки ҳужум мақсадларини кўзлаётганини билдириб, уни глобал хавфсизлик учун жиддий таҳдид деб атади. Бу ҳақда Шимолий Корея Ташқи ишлар вазирлиги ҳузуридаги АҚШ бўйича институт томонидан тайёрланган баёнотга таяниб, Корея марказий ахборот агентлиги хабар берди.

Баёнотда айтилишича, “Олтин гумбаз” АҚШнинг “Аввало – АҚШ” тамойилига асосланган ўз манфаатини устун қўювчи, зўравон ва ўзбошимча сиёсатининг маҳсули бўлиб, Шимолий Америка қитъасини стратегик рақиб давлатларнинг баллистик, қанотли ва гипертовушли ракеталаридан “монолит тарзда” ҳимоя қилишни кўзлайди.

КХДР позициясига кўра, бу ташаббус ҳимоявий чорани эмас, балки АҚШнинг бир қутбли ҳукмронликка эришиш стратегиясининг бир қисми сифатида, космик миқёсдаги ҳарбий инфратузилмани олдиндан барпо этиш орқали ядро уруши сценарийсини тайёрлашни англатади.

Шунингдек, баёнотда АҚШнинг “келажакдаги уруш майдони” сифатида космосни танлагани ва унга ҳарбий жиҳатдан ҳукмронлик ўрнатишга интилаётгани қайд этилган.

“АҚШ узоқ йиллардан бери космосни келажакдаги урушлар учун майдон деб атаб келади ва очиқчасига эълон қилмоқда: фақат космосни эгаллаганлар келажакдаги урушда ғалаба қозонади”, дейилади баёнотда.

КХДР мутахассисларининг фикрича, бу ҳаракатлар бутун дунёда стратегик қуролланиш пойгасини кучайтириб, эҳтимолий космик уруш хавфини кескин оширмоқда.

“Фақат кучлар мувозанатини симметрик тарзда ошириш орқали давлат ва минтақавий хавфсизликни кафолатлаш мумкин”, дейилади баёнотда.

Эслатиб ўтамиз, аввалроқ АҚШ Президенти Дональд Трамп Оқ уйда журналистларга берган баёнотида “Олтин гумбаз” янги ракетага қарши мудофаа тизими ҳақида гапирганди. У ушбу тизим мамлакат хавфсизлиги ва ҳатто омон қолиши учун муҳим эканини ҳамда лойиҳа учун тахминан 175 миллиард доллар ажратилиши режалаштирилаётганини маълум қилган эди.

Кейинроқ Хитой Ташқи ишлар вазирлиги расмий вакили Мао Нин “Олтин гумбаз” лойиҳаси коинотни ҳарбийлаштириш ва қуролланиш пойгасининг кучайиш хавфини оширишини айтиб, баёнот билан чиқди. Унинг сўзларига кўра, “Олтин гумбаз” – бу глобал, кўп босқичли ва чекловларсиз ракетага қарши мудофаа тизими бўлиб, АҚШнинг космосда зарба бериш имкониятларини кенгайтиришини назарда тутади.