“Олтин гумбаз” АҚШнинг омон қолиши учун зарур – Трамп

АҚШнинг “Олтин гумбаз” янги ракетага қарши мудофаа тизими мамлакат хавфсизлиги ва ҳатто омон қолиши учун муҳим. Мазкур лойиҳа учун тахминан 175 миллиард доллар ажратилиши режалаштирилмоқда. Бу ҳақда кеча, 20 май куни АҚШ Президенти Дональд Трамп Оқ уйда журналистларга берган баёнотида маълум қилди.

У АҚШ “Олтин гумбаз” тизими учун расмий архитектура режаси танлаганини эълон қилди. Унга кўра, тизим ерда ва космосда жойлашадиган янги авлод технологияларини, хусусан, космик сенсорлар ва тутувчи қурилмаларни ўз ичига олади.

“Бу бизнинг муваффақиятимиз ва ҳаттоки яшаб қолишимиз учун ниҳоятда муҳим”, дейди Трамп.

Унинг айтишича, тизимни ишлаб чиқиш ва жойлаштириш учун 3 йилдан камроқ вақт талаб этилади.

Трампнинг билдиришича, Канада ҳукумати ҳам АҚШ билан боғланиб, лойиҳага қўшилиш истагини билдирган. Ушбу масала яқин орада муҳокама қилинади.

Оқ уйда Трамп билан бирга баёнот берган АҚШ Мудофаа вазири Пит Хегсет “Олтин гумбаз” тизими ядро қуролларини тутишга ҳам мўлжалланганини айтди.

“Биз ўз мамлакатимизни қанотли, баллистик, гипертовушли ракеталар ва дронлар ҳужумидан қиламиз”, дейди Хегсет.

Шунингдек, Трамп “Олтин гумбаз”ни деярли мукаммал ҳимоя тизими деб атаган ва у Исроилнинг “Темир гумбаз” (Iron Dome) тизимидан афзал бўлишини таъкидлаган. Маълумот ўрнида, АҚШ “Темир гумбаз”ни ишлаб чиқишда ҳам иштирок этган.

Эслатиб ўтамиз, жорий йилнинг март ойида Дональд Трамп Конгресснинг иккала палатаси олдида “Америка орзусининг қайта тикланиши” мавзусида нутқ сўзлаб, Конгрессдан АҚШда тўлиқ ишлаб чиқариладиган янги “Олтин гумбаз” ракета ҳужумига қарши мудофаа тизимини яратиш учун маблағ ажратишни сўраганди.

Кейинроқ эса Трамп маъмурияти мамлакатнинг мудофаа харажатларини кескин ошириб, 1,01 триллион долларга етказиши хабар қилинди. Шу маблағлардан 175 миллиард доллари айнан “Олтин гумбаз” учун ишлатилиши режалаштирилган.