Италияда депутат арвоҳ кийимида Мелонига норозилик билдирди (видео)

Кеча, 14 май куни Италия парламентида ғалати воқеа юз берди – депутат Рикардо Маджи бошига чойшаб ёпиб, худди арвоҳ кийимида залга кириб келди ва Бош вазир Жоржия Мелонини қўрқитишга уринди. Бу ҳақда “Iltirrento” хабар берди.

Нашрга кўра, ҳодиса Бош вазир Мелони парламент аъзоларининг саволларига жавоб бераётган пайтда содир бўлган. Чап қанот мухолифат партияси “+Европа” котиби Маджи боши узра чойшаб ёпиб, ўзини арвоҳ қилиб кўрсатган ва трибуна томон йўл олиб, Мелонига нисбатан танқидлар ёғдира бошлаган.

У 8-9 июнь кунларига белгиланган референдумга эътибор қаратган — бу референдум бешта масалани, жумладан, фуқаролик ва меҳнат қонунчилиги билан боғлиқ саволларни қамраб олади. Маджининг айтишича, 2016 йилда мухолифатда бўлган Мелони ўшанда ҳукуматни референдум ҳақида сукут сақлагани учун танқид қилган.

Маджининг демарши ҳозир ҳам худди шунга ўхшаш ҳолат юз бераётгани, яъни ҳозирги ҳокимиятдаги кўпчилик вакиллар сайлов участкаларига бормасликни тавсия қилаётганига норозилик сифатида уюштирилган. Оқибатда Маджи парламент залидан чиқариб юборилган. У олиб чиқилаётган вақтда Бош вазир Мелони юзида табассум билан воқеани томоша қилиб, “арвоҳ” депутатни телефонида видеога олган.

Эслатиб ўтамиз, аввалроқ Арманистон парламенти мажлисида спикер ва мухолифат депутати ўртасидаги оғзаки тортишув охир-оқибат муштлашувга айланиб кетганди. Можарони тўхтатиш учун Давлат хавфсизлик хизмати ходимлари залга киритилган ва шундан сўнг спикер 20 дақиқалик танаффус эълон қилган.