Наполеон Бонапартга тегишли қилич аукционга қўйилади

Франциялик император Наполеон Бонапартга (1769-1821) тегишли бўлган ва у томонидан ҳокимият тепасидаги даврнинг бошидан то охиригача сақлаб келинган қилич илк бор аукционда сотувга чиқарилади. Бу ҳақда Drouot аукцион уйи баёнотига таяниб, “France24” хабар берди.

Маълумотга кўра, Бонапарт 1802-1803 йилларда мазкур қилични машҳур Вераль саройи қуролсозлик фабрикаси директори, ўз даврининг энг йирик усталаридан бири саналган Никол-Ноэл Бутега махсус буюртма қилган.

Қилич 1815 йилдан бери Наполеоннинг авлодлари қўлида сақланиб келган. Эндиликда у жорий йилнинг 22 май куни бўлиб ўтадиган аукционда 700 мингдан 1 миллион еврогача нархда баҳоланиши кутилмоқда. Шунингдек, шу қиличнинг айнан ўхшаши – Наполеон томонидан буюртма қилинган иккинчи нусха ҳозирда Санкт-Петербургдаги Эрмитажда сақланмоқда.

AFP хабарига кўра, Наполеонга тегишли буюмларнинг аукционлари император вафотидан икки асрдан кўпроқ вақт ўтган бўлишига қарамай, мунтазам ўтказиб келинмоқда. Мисол учун, 2024 йил июлида унинг 1814 йилги тахтдан воз кечишидан олдин эгалик қилган иккита тўппончаси аукционда 1,69 миллион еврога сотилган. Бундан ташқари, март ойида Наполеонга тегишли бўлган “Фуқаролик кодекси”нинг бир жилди 395 минг еврога харид қилинган.

Қайд этиш жоиз, Наполеон 1821 йилда сургунда, 51 ёшида ҳаётдан кўз юмган.

Эслатиб ўтамиз, аввалроқ “Титаник”даги 700 нафар йўловчини қутқариб қолган капитанга совға қилинган олтин чўнтак соати аукционда деярли 2 миллион доллар (ўзбек сўмида 25 миллиард 501 миллион 500 минг сўм) га сотилганди.