Трамп Зеленскийни зудлик билан ноёб металлар бўйича шартнома имзолашга чақирди

АҚШ Президенти Дональд Трамп Украина Президенти Владимир Зеленскийни имкон қадар тезроқ ноёб металлар бўйича шартнома имзолашга чақирди. Truth Social ижтимоий тармоғидаги постида Трамп Украина ҳалигача шартномани имзоламаганидан афсусда эканлигини билдирди.

“Владимир Зеленский бошчилигидаги Украина Қўшма Штатлар билан ноёб металлар бўйича жуда муҳим келишув бўйича якуний ҳужжатларни имзоламади. Имзолаш аллақачон камида уч ҳафтага кечиктирилган. Умид қиламанки, у дарҳол имзоланади”, деб ёзди Трамп.

Шу билан бирга, Трамп Россия ва Украина ўртасидаги тинчлик жараёни ҳамон муаммосиз кетаётганини ва бу йўналишдаги ишлар давом этаётганини таъкидлади.

Киев ва Вашингтон бир неча ойдирки, минерал ресурслар бўйича келишув бўйича музокаралар олиб бормоқда. 15 февраль куни Мюнхенда Владимир Зеленский Қўшма Штатлар билан келишувни тасдиқлашдан бош тортди ва унда “хавфсизлик кафолатлари бўйича аниқ нарсалар” йўқлигини тушунтирди. Ўшандан бери томонлар келишувнинг янги таҳририни муҳокама қилишмоқда.

30 март куни Дональд Трамп Зеленскийни келишувдан чиқиш ниятидаликда айблади.
Украина Ташқи ишлар вазири Андрей Сибиганинг 1 апрель куни маълум қилишича, Киев Вашингтон билан минерал ресурслар бўйича келишув икки давлат манфаатларига ўзаро мос келишини таъминлашга ҳаракат қилмоқда.

6 апрель куни Украина Бош вазирининг биринчи ўринбосари ва Иқтисодиёт вазири Юлия Свириденко келишувнинг якуний версияси ҳалигача йўқлигини айтди. Апрель ойи бошида Украина делегацияси шартнома параметрларини муҳокама қилиш учун АҚШда бўлди.