Туркманистон самолётлари яна 1 ой Россияга учмайди

“Туркманистон ҳаво йўллари” (Turkmenistan Airlines) авиакомпанияси Ашхобод-Москва-Ашхобод йўналишида парвозларни тўхтатиб туриш муддатини камида март ойига қадар узайтирди. Бу ҳақда кеча, 31 январь куни авиаташувчининг ўзига таяниб, “Интерфакс” агентлиги хабар берди.

Компания ўз қарори сабабларини тушунтирмади.

“Туркманистон ҳаво йўллари” Ашхобод ва Москва ўртасидаги парвозлар декабрь ойи охирида тўхтатилган эди. Дастлаб 2024 йил 30 декабрдан 2025 йил 31 январгача рейслар амалга оширилмаслиги эълон қилинган эди. Бунинг сабаблари ҳам ўша пайтда тушунтирилмаган.

Мазкур авиакомпания охирги марта 2023 йил августида ҳам Москва ҳаво зонасидаги ҳаво вазияти, шунингдек, парвозлар хавфсизлигини таъминлаш учун хавфларни баҳолаш асосида Москвага парвозларни тўхтатган эди. Ўшанда бу қарор Россия Мудофаа вазирлигининг Москва вилоятида Украина дрон ҳужуми бостирилгани ҳақидаги хабарлари фонида қабул қилинган эди.

Айни вақтда “Интерфакс”нинг қайд этишича, январь ойида Россиянинг S7 авиакомпанияси ҳафтасига 14 мартагача Москва-Ашхобод рейсларини амалга ошириш учун Федерал ҳаво транспорти агентлигидан рухсат олган. 15 январдан бошлаб ҳар куни парвозлар амалга оширилмоқда. Ҳозирда S7 Россия ва Туркманистон ўртасида мунтазам рейсларни амалга оширувчи ягона авиаташувчи ҳисобланади.

AZAL самолёти ҳалокати

2024 йил 25 декабрь куни эрталаб “Озарбайжон ҳаво йўллари” (AZAL)нинг Бакудан Грознийга учаётган Embraer 190 самолёти Қозоғистон ғарбидаги Актау яқинида ҳалокатга учради. Самолёт бортида 67 киши, жумладан беш нафар экипаж аъзоси бўлган. 38 киши ҳалок бўлди.

AZAL самолёт “ташқи таъсир”га дучор бўлганини маълум қилди. Тирик қолган стюардессаларнинг айтишича, Грозний узра парвоз пайтида самолётга уч марта нимадир урилган. ОАВ маълумотларига кўра, Embraer Россия ҳаво ҳужумидан мудофаа тизимидан ўққа тутилиши натижасида адашиб уриб туширилган бўлиши мумкин. Ҳалокатга учраган самолётнинг қора қутилари экспертиза учун Бразилияга юборилган. Озарбайжон Президенти Илҳом Алиев ҳалокатда Россияни айблади.

Ушбу фожиадан сўнг нафақат “Туркманистон ҳаво йўллари”, балки бошқа қатор авиакомпаниялар ҳам Россияга парвозларни тўхтатди. Хусусан, Исроилнинг El Al авиакомпанияси март ойи охиригача Москвага парвозларни бекор қилди.