Курск вилоятининг яна бир туманида эвакуация бошланди

Украина Қуролли кучлари 6 августдан буён фаолият юритаётган Россия Федерацияси Курск вилоятининг Болшесолдатский туманида аҳоли ўз кучи билан ва маҳаллий маъмурият ёрдамида эвакуация қилинмоқда. Бу ҳақда туман раҳбари Владимир Зайцев бугун, 13 август куни Telegram-каналида хабар берди. 

“Мен қўлимдан келган ҳамма нарсани қиламан: биз тинч аҳолини олиб чиқамиз, ҳарбийларга ёрдам берамиз, озиқ-овқат билан таъминлаймиз, ёнғинларни ўчирамиз. Ҳудудимизда шу кунгача ҳеч қандай эвакуация қилинмаган. Ҳамма ўзи кетди, ҳеч ким аралашмади. Бугун биз ҳали ҳам эвакуация қилиниши керак бўлганлар ҳақида маълумот йиғмоқдамиз”, деб ёзди расмий.

Зайцевнинг сўзларига кўра, 12 август ҳолатига кўра, ҳудудда эвакуация бўйича ҳеч қандай сўров бўлмаган. Болшесолдацкий тумани Суджанский тумани, Мартиновка қишлоғидан саккиз километр узоқликда жойлашган. Telegram-каналларига кўра, украиналик ҳарбийлар етиб келган, ҳудуднинг ўзида жанглар кетмоқда.

Курск вилояти раҳбари вазифасини бажарувчи Алексей Смирнов минтақадаги 180 минг киши эвакуация қилиниши кераклигини айтган эди. “Газета.ru” интернет-нашрининг ёзишича, 12 августга келиб 121 минг аҳоли аллақачон уйларини тарк этган. Курск вилоятининг Глушковский, Кореневский, Суджанский туманларида ҳам аҳолининг ихтиёрий равишда чиқиб кетиши ташкил этилди. Шу билан бирга, қўшни Белгород вилоятининг Краснояружский тумани аҳолиси уни деярли бутунлай тарк этди.

Украина Қуролли кучлари 6 августдан бери Россия Федерациясининг Курск вилоятида операция ўтказмоқда. Украина хавфсизлик хизматининг юқори мартабали мулозимининг AFP агентлигига айтишича, операцияда “минглаб” Украина ҳарбийлари иштирок этган. Унинг сўзларига кўра, ҳужумнинг мақсади фронтни рус кучлари учун “чўзиш” ва Россия Федерациясини “беқарорлаштириш”.