Сурхондарёда ЙПХдан қочган Captiva Lacetti билан тўқнашди

Сурхондарё вилоятининг Олтинсой туманида тўхташ ишорасига бўйсунмай қочган Captiva бошқа Lacetti билан тўқнашди. Бу ҳақда вилоят Йўл ҳаракати хавфсизлиги бошқармаси хабар берди.

Маълум қилинишича, ҳодиса жорий йилнинг 18 октябрь куни соат 08:20 ларда туманнинг Янги қурилиш маҳалласида юз берган. Хизмат вазифасини бажараётган ЙПХ инспектори ҳайдовчилик ҳуқуқига эга бўлмаган шахс бошқарувидаги Captiva русумли автомобилни тўхтатмоқчи бўлган. Бироқ ҳайдовчи қонуний тўхташ ишорасига бўйсунмай, ҳаракатини давом эттирган.

Инспектор ўзига бириктирилган Lacetti русумли хизмат автомобилида Captiva’ни кузатиб борган. Шу вақт ҳайдовчи бошқарувни йўқотиб, асосий йўлда ҳаракатланаётган Lacetti автомобилининг йўлига чиқиб кетган ва ЙТҲ содир бўлган.

Билдирилишича, ҳозирда ҳолат юзасидан Олтинсой тумани прокуратураси томонидан терговга қадар текширув олиб борилмоқда. Шунингдек, ЙПХ инспекторига нисбатан хизмат текшируви тайинланган.

Эслатиб ўтамиз, аввалроқ Қашқадарё вилояти Чироқчи туманида йўл-патруль хизмати ходимларининг қонуний талабига бўйсунмай, қочишга уринган ҳайдовчи патруль автомобилига урилиб, йўл-транспорт ҳодисаси содир этганидан сўнг ушлангани ҳақида хабар берилган эди.