Швейцария Президенти истеъфога чиқишини эълон қилди

Швейцария Президенти Ги Пармелен ҳукуматдаги 11 йиллик фаолиятидан сўнг 2026 йил охирида Федерал кенгашни тарк этишини маълум қилди. Бу ҳақда у бугун, 2 октябрь куни Берндаги матбуот анжуманида маълум қилди.

“Neue Zürcher Zeitung” нашрининг ёзишича, Пармелен бу қарорини ёшроқ авлодга ўрин бўшатиш истаги билан изоҳлаган. Унинг сўзларига кўра, ҳукуматга, айниқса геосиёсий қийинчиликлар даврида янги кучлар керак. Шу тариқа, сиёсатчи Швейцария Президенти лавозимидаги иккинчи муддати якунлангач, йил охирида лавозимини тарк этмоқчи.

Пармелен, шунингдек, истеъфога чиқиш қарори унинг саломатлиги ҳолати билан боғлиқ эмаслигини билдирган. У 2016 йилдан бери Федерал кенгаш таркибига киради, 2019 йилдан эса Федерал иқтисодиёт, таълим ва тадқиқотлар департаментига раҳбарлик қилиб келмоқда.

Маълумот учун, Ги Пармелен – Швейцария давлат ва сиёсат арбоби, Швейцaрия Халқ партияси (SVP) аъзоси. У 1959 йил 9 ноябрда Во кантонининг Бурсен шаҳрида туғилган. Мутахассислиги бўйича қишлоқ хўжалиги мутахассиси ва узумчи ҳисобланади. Сиёсий фаолиятини маҳаллий ва кантон даражасидаги органларда бошлаган, 2003 йилдан 2015 йилгача эса Швейцария Миллий кенгаши (парламент қуйи палатаси) депутати сифатида фаолият юритган.

2016 йилда Ги Пармелен мамлакатнинг олий ижроия органи – Швейцария Федерал кенгаши (ҳукумати) таркибига сайланган. У 2016-2018 йилларда Мудофаа, аҳолини муҳофаза қилиш ва спорт федерал департаментини, 2019 йилдан буён эса Иқтисодиёт, таълим ва тадқиқотлар федерал департаментини бошқариб келмоқда. Бундан ташқари, Швейцариядаги давлат раҳбарининг ротация тизимига мувофиқ, Пармелен 2021 йилда мамлакат Президенти лавозимини эгаллаган бўлса, 2026 йилда иккинчи муддатга Швейцария Президенти этиб сайланган. Ҳукуматдаги 11 йиллик фаолияти давомида у ўзини вазмин ва мувозанатли сиёсатчи, айниқса турли инқирозли вазиятларни самарали бошқарувчи раҳбар сифатида намоён этган. 

Эслатиб ўтамиз, аввалроқ Сербия Президенти Александр Вучич иккинчи ва сўнгги беш йиллик президентлик муддати тугашига етти ой қолганида истеъфога чиққани, бу эса мамлакатда муддатидан олдин президентлик сайловларини ўтказишга йўл очгани ҳақида хабар берилган эди.