Конгода 100 кишини олиб кетаётган кема ағдарилиб кетди. Қурбонлар бор

Конго Демократик Республикасида қарийб 100 кишини олиб кетаётган кема Танганьика кўлида ағдарилиб, 41 киши ҳалок бўлди. Яна 49 киши қутқарилган, қолган йўловчиларни излаш ишлари давом этмоқда. Бу ҳақда "Sky News" хабар берди.

Қайд этилишича, ҳодиса жорий йилнинг 24 сентябрь куни юз берган. Танзаниянинг Кигома шаҳридан Конго Демократик Республикасининг Танганьика провинциясидаги Калеми шаҳрига йўл олган қайиқ Мапера қишлоғи яқинида ағдарилиб кетган.

Вилоят транспорт вазири Норрис Мулонгойининг маълум қилишича, кемада юклар билан бирга қарийб 100 киши бўлган. Уларнинг 49 нафари қутқарилган, қолган йўловчиларни излаш ишлари давом этмоқда. Ҳодисанинг аниқ сабаби ҳозирча маълум қилинмаган.

Маълумотларга кўра, Танганьика кўли дунёдаги энг катта чучук сувли кўл ва чуқурлиги бўйича Байкал кўлидан кейин иккинчи ўринда туради.

Эслатиб ўтамиз, аввалроқ Нигериянинг Сокото штатида одамлар ортиқча юкланган қайиқ ағдарилиши оқибатида камида 50 киши ҳалок бўлгани ҳақида хабар берилган эди.