Қишлоқ хўжалиги ерлари энди 49 йилга ижарага берилиши мумкин

Ўзбекистонда қишлоқ хўжалигига мўлжалланган ерларни ижарага бериш муддати 49 йилгача узайтирилиши мумкин. Бу ҳақда парламентнинг тегишли қонун лойиҳасида сўз боради.

Маълум қилинишича, Олий Мажлис Қонунчилик палатасининг кеча, 22 июлда ўтказилган навбатдаги мажлисида ер участкаларига бўлган ҳуқуқларни тизимлаштиришга қаратилган қонун лойиҳаси қабул қилинган ва Сенатга юборилган.

Мазкур ҳужжат билан қишлоқ хўжалигига мўлжалланган ерларни ижарага бериш муддатини амалдаги 30 йилдан 49 йилга узайтириш таклиф этилмоқда.

Қишлоқ хўжалигига мўлжалланмаган ер участкаларини ижарага беришнинг энг кўп муддати эса 49 йил этиб белгиланмоқда.

Чет эл фуқаролари ва юридик шахслари, фуқаролиги бўлмаган шахслар ҳамда чет эл инвестициялари иштирокидаги корхоналарга қишлоқ хўжалиги ерларидан иккиламчи ижара ҳуқуқи асосида фойдаланиш тартиби белгиланмоқда.

Шунингдек, ноқишлоқ ерлар ижарасига оид қоидалар соддалаштирилиб, ерларни аукцион орқали ижарага олишга ва ушбу ерни қайта ижарага беришга рухсат берилмоқда. Бундан ташқари, якка тартибдаги уй-жойлар жойлашган ер участкаси ижара ҳуқуқи асосида берилиши мустаҳкамлаб қўйилмоқда.

Эслатиб ўтамиз, жорий йил 21 апрелда Президент Шавкат Мирзиёев танишган ер ресурсларидан янада самарали фойдаланишга қаратилган таклифлар тақдимотида мазкур соҳа доирасидаги бир қанча янги тартиб лойиҳалари кўриб чиқилганди. Хусусан, тақдимот йиғилишида айни пайтда ерларни ижарага бериш муддатини барча турдаги ерлар учун, шу жумладан, саноат ва қурилиш лойиҳаларини амалга оширадиган чет эллик инвесторлар учун ҳам 49 йил этиб белгилаш таклиф этилганди.