АҚШ Эроннинг ҳарбий объектига аниқ зарбалар берди – Трамп

Америка ҳарбийлари Эроннинг Қешм ороли ҳудудидаги зенит қурилмасига зарба берди. Бу ҳақда бугун, 7 ноябрь куни АҚШ Президенти Дональд Трамп журналистлар билан суҳбатда маълум қилди.

“Биз кичик зарбалар беряпмиз, аммо улар объектларни ишдан чиқармоқда. Улар (эронликлар. - таҳр. изоҳи) кичик зенит қурилмасини барпо этишган эди, биз уни тахминан 15 дақиқада, балки беш дақиқада ишдан чиқардик”, дейди у журналистларга.

Қайд этилишича, бугун, 7 ноябрга ўтар кечаси Эрон жанубидаги оролда бир қатор портлашлар юз берган. Кейинчалик IRIB давлат телевидениеси ҳаво ҳужумилан мудофаа кучлари ушбу ҳудудда Американинг MQ-9 Reaper дронини йўқ қилганига аниқлик киритган.

Эслатиб ўтамиз, жорий йилнинг июнь ўрталарида Вашингтон ва Теҳрон тинчлик жараёнини бошлаши керак бўлган меморандумни имзолаган эди. Шунга қарамай, уч ҳафта ўтиб зарбалар қайта бошланди. Ўшандан бери томонлар вазиятни тартибга солишга уринмоқда, аммо келишмовчиликлар сабабли бу ҳали муваффақият келтирмади.

Сентябрь охирида Эрон Қўшма Штатларга денгиз блокадаси ва экспортга қўйилган чекловларни бекор қилиш эвазига Ҳормуз бўғизини очиш бўйича етти кунлик режани ўз ичига олган таклифларни топширди. Трамп уни рад этди.

Жорий йилнинг 2 ноябрь куни Эрон ТИВ раҳбари Аббос Ароқчи ўшандан бери режани бажаришнинг тахминий муддатини икки суткагача қисқартиришга эришилганини, энди ҳамма нарса Америка томонининг жавобига боғлиқлигини маълум қилди.