АҚШ Эронга қарши янги ҳужумга тайёрланяпти: минтақада йирик флот тўпланди

АҚШ Президенти Дональд Трамп Яқин Шарқда Эронга қарши бир неча кун ичида зарба бериши мумкин бўлган йирик ҳарбий кучларни жамламоқда. У Эроннинг ядровий дастури йўқ қилинганини айтган бўлса-да, яна бир ёки иккита объектни нишонга олиш зарурлигини билдирган. Трампнинг айтишича, бундай операция атиги 10 дақиқа вақт олиши мумкин. Бу ҳақда у Флорида штатидаги Мар-а-Лаго қароргоҳида журналистлар билан суҳбатда маълум қилди. 

АҚШ Президенти эҳтимолий нишонлар қаторида Эрондаги Коланг тоғини ҳам тилга олган. “Кирка тоғи” (Pickaxe Mountain) номи билан ҳам танилган ушбу ҳудуд остида ядровий мажмуа жойлашган бўлиши мумкин. Трамп бу объектга ҳам эътибор қаратиш кераклигини айтган.

Тоғ Исфаҳон вилоятида, Теҳрондан тахминан 200 километр жанубда, Натанз ядровий объекти яқинида жойлашган. Эрон ҳукумати бу ерда ядровий дастур доирасида ишлар олиб борилаётганини инкор этади.

Трампнинг айтишича, АҚШ ҳозирча шошилмаяпти, чунки урушни тўхтатиш бўйича музокаралар “яхши” давом этмоқда. Бироқ у Эрон томонига ишониш қийинлигини ҳам таъкидлаган. Давлат котиби Марко Рубио эса Президент ҳали янги зарбалар бериш бўйича қарор қабул қилмаганини ва Вашингтон дипломатик ечимга очиқ эканини билдирган.

Шу билан бирга, АҚШ ҳарбий кучларини жанговар шайлик ҳолатига келтирмоқда. Трамп Арабистон денгизида учта авиаташувчи, 17 та ҳарбий кема ва 20 мингдан ортиқ ҳарбий хизматчидан иборат йирик флотни тўпламоқда. Президент буйруқ берганидан кейин қўшинлар 96 соат ичида зарба беришга тайёр. 3 ноябрь куни бўлиб ўтадиган оралиқ сайловлардан кейин Трамп исталган вақтда ҳужум бошлашга буйруқ бериши мумкин.

Теҳрон эса Вашингтоннинг таҳдидларига кескин жавоб қайтарди. 31 октябрь куни Эрон олий раҳбари Мужтабо Хоманаий мамлакат олий ҳарбий қўмондонлиги билан учрашувда ҳар қандай таҳдидга зудлик билан, самарали ва географик чегаралар билан чекланмаган ҳолда жавоб қайтарилиши кераклигини айтган эди.

Эрон армияси вакили Муҳаммад Акраминя ҳам давлат телеканали орқали эҳтимолий янги уруш аввалги тўқнашувдан узоқроқ давом этиши мумкинлигини билдирган. Унинг таъкидлашича, Трамп урушнинг якунланиш муддати ёки шартларини белгилаш имконига эга эмас.