1 млрд сўмлик тиллани яширинча олиб киришга уринганлар ушланди

Тошкент халқаро аэропортида қарийб 691 грамм тилладан ясалган, дастлабки қиймати 1 миллиард 20 миллион сўмдан ошадиган заргарлик буюмларини божхона назоратидан яшириб олиб киришга уринишлар аниқланди. Бу ҳақда Божхона қўмитаси хабар берди.

Қайд этилишича, сўнгги кунларда “Тошкент-AERO” ИБКнинг “Тошкент халқаро аэропорти” чегара божхона пости ходимлари хориждан келган йўловчилар билан боғлиқ бир нечта қонунбузарлик ҳолатларини фош этган.

Хусусан, турли хорижий йўналишлардан учиб келган йўловчиларнинг юклари орасидан ва ёнидан божхона назоратига белгиланган тартибда тақдим этилмаган тилла тақинчоқлар топилган.

Аниқланган заргарлик буюмларининг умумий оғирлиги қарийб 691 граммни, дастлабки қиймати эса 1 миллиард 20 миллион сўмдан ортиқни ташкил этган.

Билдирилишича, ҳозирда мазкур ҳолатлар юзасидан божхона текширувлари давом эттирилмоқда.

Эслатиб ўтамиз, аввалроқ Наманган вилоятида Қирғизистондан Ўзбекистонга 301 минг 462 дона пиротехника буюмини ноқонуний олиб киришга уриниш фош этилгани ҳақида хабар берилган эди.