Байден АҚШ бўйлаб талабалар намойишининг авж олишида рақибларини айблади

АҚШдаги айрим коллеж ва университетларда Фаластинга хайрихоҳ намойишлар бошланганидан бир неча ҳафта ўтиб, мамлакат Президенти Жо Байден ниҳоят бу ҳақда сўз очди. У норозилик демократиянинг муҳим қисми эканини айтаркан, шунга қарамай аҳолини тартибсизликка берилмасликка чақирди ва республикачиларни ушбу вазиятдан сайлов кампанияси учун фойдаланаётганликда айблади. У бу ҳақда кеча, 2 май куни Оқ уйда бўлиб ўтган брифинг чоғи маълум қилди.

Унга кўра, шундай пайтларда ҳамиша сиёсий очко тўплашга ошиқадиган одамлар бўлади.

“Аммо ҳозир сиёсий ўйинлар мавриди эмас. Аниқлик пайтидир”, деган Президент.

Исроилнинг Ғазо секторидаги ҳарбий амалиётига қарши Америка университетларида ўтказилаётган норозиликларни изоҳлар экан, Байден сўз эркинлиги ва қонун устуворлиги ҳурмат қилиниши кераклигини айтган. Байден билвосита муаммоларга муносабат билдириш учун тинч намойиш қилиш америкаликлар учун ажойиб анъана эканлигига урғу берган.

“Биз ҳаммамиз Американинг иккита асосий тамойилини синовдан ўтказувчи кадрларни кўрдик: биринчидан, сўз эркинлиги ва одамларнинг тинч намойиш ўтказиши, ўз фикрини айтиш ҳуқуқи. Иккинчиси - қонун устуворлиги. Бу иккала тамойилга ҳам риоя қилиш керак, биз қонунсиз мамлакат эмасмиз. Маданиятли жамиятмиз, тартиб устун бўлиши керак”, дея қўшимча қилган у.

Байденнинг айтишича, коллежлар кампусларидаги намойишчилар ўз фикрларини эркин ифода этиш ҳуқуқига эга, лекин қонунни бузмаслиги ёки зўравонлик қилмаслиги керак. Унинг қўшимча қилишича, Америкада антисемитизм – яҳудий талабаларга нисбатан зўравонлик таҳдиди, шунингдек, араб ёки фаластинлик америкаликларга нисбатан исломофобия ёки камситиш учун жой йўқ. Бироқ бундай намойишлар АҚШнинг позициясини ўзгартирмайди.

Журналистлардан бирининг “Намойишлар Вашингтоннинг Исроил ва Яқин Шарққа нисбатан сиёсатини қайта кўриб чиқишга мажбур қилдими?” деган саволига  Байден "Йўқ", деб жавоб қайтарган.

Маълумот учун, апрель ойи ўрталаридан бери Американинг ўнлаб университетлари майдонларида Фаластин тарафдорлари норозилик намойишлари бўлиб ўтмоқда. Намойишлар Лос-Анжелесдаги Калифорния университети, Техас университети, Чапел-Хиллдаги Шимолий Каролина университети, Колумбия университети ва бошқаларни қамраб олди. Талабалар кампусларида АҚШдан Исроил билан барча молиявий алоқалардан воз кечиш ва Ғазо секторидаги жангларни қўллаб-қувватлашни тўхтатиш талаби билан митинглар ўтказмоқда. Уч ҳафта давомида 1500 дан ортиқ талаба ҳибсга олинган.

Эслатиб ўтамиз, аввалроқ АҚШда талабалар Исроилга қарши оёққа тургани ҳақида фоторепортаж тайёрланган эди.