BAAda koronavirus aniqlandi

Birlashgan Arab Amirliklarida yangi koronavirus bilan kasallangan ilk bemor aniqlandi. Bu haqda Amirlik Sog‘liqni saqlash vazirligi tomonidan tarqatilgan xabarda aytilgan.

“BAAda koronavirus bilan kasallangan birinchi holat ro‘yxatga olindi. Bemorning salomatligi barqaror, u shifokorlar nazoratida”, deyiladi vazirlik xabarida. Ammo xabarda bemor kimligi va qayerda aniqlangani haqida ma’lumot berilmagan.

Koronavirus Xitoydan tarqala boshladi. Virus bilan kasallanganlar ko‘plab mamlakatlarda aniqlandi. Jumladan, Kamboja, Gongkong, Makao, Tayvan, Tailand, Yaponiya, Janubiy Koreya, AQSH, Vetnam, Singapur, Nepal, Fransiya, Germaniya, Avstraliya va Malayziyada qayd qilingan.

Xitoyda ushbu virusdan kasallanganlar soni 5974 nafarga yetdi, qurbonlar soni 132 nafar. Dunyo bo‘yicha ushbu virusni yuqtirganlar 6062 nafarga yetdi. Avstraliyada yangi koronavirus laboratoriya usulida kashf qilindi. U kasallikni o‘rganishga yordam berishi taxmin qilinyapti.