Kisida vazirlari bilan AES suvi to‘kilgan hududdan tutilgan baliqni yedi (video)

Yaponiya Bosh vaziri Fumio Kisida bir necha vazirlar bilan “Fukusima-1” AESdan suvning okeanga chiqarilishini muhokama qildi va tushlik paytida ular bilan bir xil nomdagi prefekturadan olingan dengiz mahsulotlarini tatib ko‘rdi. Bu haqda Iqtisodiyot, savdo va sanoat vaziri Yasutoshi Nishimura ma’lum qildi.

Tushlik paytida Bosh vazir boshchiligidagi Vazirlar Mahkamasi a’zolariga kambala, levrek baliqlari va Fukusima qirg‘oqlarida tutilgan sakkizoyoqdan tayyorlangan sashimi taomi, shuningdek, mintaqadan cho‘chqa go‘shti, guruch va qovun tortildi.

"Bu juda mazali edi, ayniqsa sakkizoyoq juda yumshoq edi", deydi Nishimura.

Ko‘rinishidan Yaponiya hukumati shu tariqa favqulodda atom elektr stansiyasi joylashgan prefektura mahsulotlari xavfsizligini namoyish etmoqchi. Bunga qaramasdan, ayrim davlatlar Tokioning yadro yoqilg‘isi erigan reaktorlarni sovutish uchun foydalanilgan suvni okeanga tashlash qaroridan xavotir bildirgan. Xitoy Xalq Respublikasi Bosh bojxona boshqarmasi 24 avgustdan boshlab Yaponiyadan dengiz mahsulotlari importini butunlay to‘xtatgan.

Kisida esa rasmiylar baliqchilik sanoati korxonalari hech qanday zarar ko‘rmasligi uchun barcha zarur choralarni ko‘rishini va’da qilgan. Bundan tashqari, uning so‘zlariga ko‘ra, hukumat baliq mahsulotlari iste’molini oshirishga qaratilgan sa’y-harakatlarni rag‘batlantiradi.

Eslatib o‘tamiz, joriy yilning 24 avgust kuni Tokyo Electric Power (TEPCO) energetika kompaniyasi radioaktiv moddalardan tozalangan suvning birinchi partiyasini “Fukusima-1” atom elektr stansiyasidan okeanga tashlashni boshlagandi. Ikki kundan so‘ng TEPCO to‘kilgan joydan 3 km radiusdagi 10 xil hududdan olingan suv namunalarida tritiy topilmaganini e’lon qildi. Yaponiya baliqchilik boshqarmasi ozod qilingan joydan 5 km uzoqlikda ovlangan baliqlarda tritiy izlarini topmadi.