Мирзиёев Қозонда Путин билан учрашди (видео)

Россия Федерацияси Президенти Владимир Путин Ўзбекистон давлат раҳбари Шавкат Мирзиёев билан Қозон шаҳрида  музокара ўтказди. Бу ҳақда Кремль матбуот хизмати маълум қилди.

Илк маълумотларга кўра, Россия етакчиси "Келажак ўйинлари" халқаро турнирнинг очилиш маросимига ташриф буюргани учун Мирзиёевга миннатдорлик билдирган.

Шу жумладан, Путин мусобақада 104 та давлат спортчилари иштирок этаётгани ҳамда бешта йўналишда ҳам ўзбекистонлик спортчилар борлигини эътироф этган.

Шавкат Мирзиёев эса ушбу турнирда биринчи марта Ўзбекистондан 19 нафар иштирокчи  қатнашаётганини билдирган.

Киберспорт ҳақида фикр билдирган Путин бу йўналиш спорт тарихида истиқболли бўлишига ишонишини айтган.

"Бу, менинг фикримча, спортнинг ноодатий, очиғини айтганда, жуда истиқболли йўналиши бўлиб, барча учун қизиқарлидир. Ҳар ҳолда, ҳозир бутун дунёда ёшларнинг ушбу спорт турига қизиқиши ортиб бормоқда", деган Россия Президенти.

Шунингдек, Россия раҳбари яқинда Ўзбекистонда бўлган ҳукумат делегациясини ёдга олган. Иқтисодий алоқалар асосий йўналишларда жуда жадал ривожланаётгани, янги истиқболли режалар тузилаётганини урғулаган.

Эслатиб ўтамиз, аввалроқ Мирзиёев амалий ташриф билан Россияга етиб боргани ҳақида хабар берган эдик.