“Путин биздан қўрқади”. Зеленский Кремлнинг “лағмонлари” ҳақида гапирди

Украина Президенти Владимир Зеленский Бразилия оммавий ахборот воситаларига берган интервьюсида "фронтда аҳвол чатоқ, ташаббус руслар қўлида" қабилидаги гап-сўзларни "Кремлнинг тўқима ҳикоялари", деб атади. 

Зеленскийнинг таъкидлашича, "русларнинг чиндан қуроллари бор" ва улар Украина ҳарбийларига қараганда кўпроқ. 

"Ҳозир вазият мураккаб бўлиши мумкин, бироқ ҳарбий ёрдам маъқулланиши билан бизда ҳам қуроллар бўлади. Биз шунчаки умид қилмаймиз, балки бунинг учун курашамиз", дейди у.

Унинг таъкидлашича, украиналиклар ўз мамлакатлари, мустақиллиги ҳамда Европа Иттифоқи ва НАТОга қўшилиш режалари учун курашдан воз кечмайди. 

“Ҳали ҳеч ким таслим бўлгани йўқ. Путин биздан жуда қўрқади. Менинг бунга ишончим комил", дея қўшимча қилган Украина Президенти.

Зеленский, шунингдек, яқин ойларда Украина бир қатор давлатлар, жумладан, АҚШ билан хавфсизлик бўйича икки томонлама шартнома имзолашини айтган. Унга кўра, хавфсизлик шартномаси нафақат мудофаа, балки реконструкция, молиявий ва иқтисодий ёрдамни ҳам қамраб олади.