Ўзбекистон терроризм бўйича халқаро рейтингда нечанчи ўринда?

Глобал терроризм индексининг (ГТИ) 2023 йилги рейтинги эълон қилинди. Мазкур индексда Ўзбекистон 70-ўринда қайд этилган. Бу ҳақда ташкилотнинг расмий веб-сайтида хабар берилди.

Афғонистон террористик вазият бўйича энг оғир мамлакат сифатида қайд этилган. 2022 йилда мамлакатда 633 нафар теракт қурбонлари рўйхатга олинган. 

Марказий Осиё давлатларида эса вазият анча яхшироқ. Тожикистон рейтингда 50-ўринни эгаллаган бўлса, Ўзбекистон 70-ўринга лойиқ кўрилган. Қозоғистон, Қирғизистон ва Туркманистон эса мос равишда 93-ўринни бўлишган.

Дунёнинг Афғонистондан бошқа қисмида терроризм қурбонлари сони 4 фоизга ошган. ИШИД ва унинг бўлинмалари 2022 йилда кетма-кет саккизинчи йил давомида 21 мамлакатда ҳужумлар уюштирган ҳолда энг ҳалокатли террорчилик гуруҳи бўлиб қолган.

Саҳел дунёдаги терроризмдан энг кўп зарар кўрган минтақа бўлиб, Нигерия ва Нигердаги яхшиланишларга қарамай, 2022 йилда сезиларли даражада ёмонлашувни қайд этган. Буркина-Фасо ва Малида ҳам терроризм қурбонлари сони сезиларли даражада ошган.

Ўтган йили терроризм 6701 кишининг ўлимига сабаб бўлган, бу 2015 йилдаги энг юқори чўққига нисбатан 38 фоизга кам ҳисобланади. 

Иқтисодиёт ва тинчлик институти асосчиси ва ижрочи раиси Стив Киллеа Терроризмга қарши курашиш учун тизимли ёндашувлар ҳақида гапираркан, Украинадаги урушга ҳам тўхталиб ўтган.

“Украинадаги можаро бутун дунё эътиборини қаратиб, терроризмга қарши глобал кураш сиёсий кун тартибида долзарблигича қолмоқда. Унинг табиати ривожланиб борар экан, халқаро ҳамжамиятнинг муносабати ривожланишда давом этиши зарур. Бу хотиржамлик учун вақт эмас ва диққатни йўқотиш келажакда терроризм таҳдидининг кучайишига олиб келади. Терроризмга қарши кураш дунёнинг қудратли давлатлари умумий мақсадга эга бўлган саноқли тармоқлардан биридир”, дейди у.

Маълумот учун, мазкур индекс 2007 йилдан буён содир этилган теракт ва ҳалок бўлганлар сони бўйича маълумотлар асосида ҳисобланади.