Исроил қўшинларида жанг қилган Жанубий Африка фуқаролари қамалади – ТИВ 

Жанубий Африка Ташқи ишлар вазири Наледи Пандор Исроил Қуролли кучлари сафида ёки улар билан бирга Ғазода жанг қилган фуқаролар ватанларига қайтганларида ҳибсга олинишини айтди. У бу ҳақда кеча, 13 март куни "Фаластин бирдамлик" тадбиридаги чиқишида маълум қилди.

Наледи Пандор шу ҳафта бошида Жанубий Африканинг ҳукмрон Африка Миллий Конгресси партияси расмийлари иштирок этган "Фаластин бирдамлик" тадбирида одамларни Исроилнинг бешта асосий тарафдор давлатлари ва унинг Ғазодаги ҳарбий ҳаракатларига қарши элчихоналар олдида намойишга чиқишга ундаган. У гарчанд исроилпараст давлатларнинг номини аниқ айтмаган бўлсада Америка Қўшма Штатлари, Буюк Британия ва Германиянинг бу рўйхатда борлиги хорижий нашрлар томонидан таъкидланмоқда.

"Мен аллақачон жанубий африкалик бўла туриб Исроил мудофаа кучлари сафида ёки улар билан ёнма-ён жанг қилаётганларни огоҳлантирувчи баёнот бердим: Биз тайёрмиз. Уйга келгач, биз сизни ҳибсга олишга тайёрмиз!", деган вазир намойишкорона чиқиши давомида.

Бироқ, Ғазодаги жорий уруш пайтида қанча Жанубий Африка фуқароси Исроил учун жанг қилгани аниқ эмас.  Жанубий Африкада 70 000 га яқин яҳудийлар яшайди. 

Маълумот учун, декабрь ойида Ташқи ишлар вазирлиги Жанубий Африка ҳукумати ўз фуқаролари ёки доимий яшовчиларнинг баъзилари Ғазода жанг қилиш учун ЦАХАЛ сафига қўшилганидан хавотирда эканини ва агар уларга ҳукумат томонидан рухсат берилмаган бўлса, улар жиноий жавобгарликка тортилиши мумкинлиги ҳақида огоҳлантирган. Ҳам Жанубий Африка, ҳам Исроил фуқаролигига эга бўлганлар Жанубий Африка фуқаролигидан маҳрум қилиниши билдирилган.

Таъкидлаш жоизки, 2023 йилнинг ноябрь ойи бошларида ЖАР Исроилдан барча дипломатларини чақириб олган эди. Орадан  қарийб икки ой ўтиб, 30 декабрь куни мамлакат Исроилни Ғазодаги қўпорувчилик ҳаракатлари юзасидан Халқаро судга берди. Суд жорий йилнинг январь ойида Исроил Ғазода геноциднинг олдини олиш учун зарур чораларни кўриши кераклиги ҳақидаги вақтинчалик қарор қабул қилди.