Ziroat Mirziyoyeva to‘ng‘ich qizi bilan Seuldagi Milliy reabilitatsiya markaziga bordi

O‘zbekiston Respublikasining Birinchi xonimi Ziroat Mirziyoyeva va Koreya Respublikasining Birinchi xonimi Kim Chen Suk Seuldagi Milliy reabilitatsiya markaziga tashrif buyurdi. Ularga Saida Mirziyoyeva ham hamrohlik qilgan. Bu haqda “Zamin” fondi ma’lum qildi.

Qayd etilishicha, markaz nogironligi bo‘lgan shaxslar salomatligini mustahkamlash va ularning jamiyatga qo‘shilishiga reabilitatsiya, tadqiqot va ta’lim yo‘li bilan yordam beradi.

Shuningdek, mehmonlar markazning ilg‘or tajribasi bilan tanishgan. Innovatsion texnologiyalar, laboratoriya faoliyati, shuningdek, nogironligi bo‘lgan shaxslar uchun zamonaviy yordamchi vositalarni ishlab chiqarish jarayoni namoyish etilgan.

“Bu boradagi xalqaro tajriba biz uchun juda foydalidir. Bunday hamkorlik kelajakda jamiyatda inklyuziyaga erishish yo‘lidagi rejalarimizda muhim ahamiyatga ega”, deyiladi jamg‘arma xabarida.