Жо Байден иқлим ўзгаришига қарши кураш бўйича янги чораларни эълон қилди

Олам 1657
image

АҚШ Президенти Жо Байден кеча, 11 ноябрь куни АҚШнинг иқлим ўзгаришига қарши кураш, жумладан, иссиқхона газлари чиқиндиларини камайтириш бўйича янги ташаббусларини эълон қилди. 

У дунё мамлакатларини иқлим инқирозини бартараф этиш учун чора кўришга чақирди. 

“Бугун мен ишонч билан айта оламанки, биз 2030 йилгача эмиссияни қисқартириш бўйича мақсадларимизга эришамиз”, дейди Байден Мисрнинг Шарм аш-Шайх шаҳрида, Бирлашган Миллатлар Ташкилотининг Иқлим Конференциясида. 

Унинг аниқлик киритишича, АҚШ мақсади 2030 йилга бориб 2005 йилга нисбатан иссиқхона газлари чиқиндиларини 40 фоизга камайтиришдир. 

Байден Қўшма Штатларда метан эмиссиясини қисқартириш бўйича янги қоидалар кучга киришини қўшимча қилди, бу эса 2030 йилга келиб эмиссияларни 2005 йил даражасига нисбатан 87 фоизга камайтиришга ёрдам беради. 

Бундан ташқари, Америка етакчиси мамлакатларни глобал исишни Селсий бўйича 1,5 даражагача чеклаш ва иссиқхона газлари чиқиндиларини камайтириш бўйича саъй-ҳаракатларни бирлаштиришга чақирди. 

“Агар биз ушбу ўзгаришлар бўйича ҳаракатни тезлаштира олсак, мақсадимизга эриша оламиз. Аммо эмиссия манзарасини абадий ўзгартириш учун ҳар бир давлат чора кўриши керак”, дейди Байден. 

Байден АҚШнинг иқлим бўйича мажбуриятларини бажаришга ваъда берди, жумладан, ўтган йили 2024 йилгача иқлим ўзгариши бўйича йилига 11,4 миллиард долларлик мажбурият. Бундан ташқари, АҚШ маъмурияти иқлим ўзгаришига мослашиш бўйича мамлакатларга ёрдам ажратишни икки баробарга оширади ва энди бу жамғарма миқдори 100 миллион долларни ташкил этади. 

“Биз иқлимий мақсадларимизга эришиш учун воситалар доимо мавжуд бўлишини таъминлаш учун ҳаракат қиламиз”, дейди у.

Qalampir.uz Tahririyati
Мақолага баҳо беринг
Баҳолаганлар: 16
Рейтинг: 3.3
t
×