Жаҳон чемпионати кубоги Мексикага етказилди

2026 йилги Жаҳон чемпионати кубоги Мексикага етказилди. Тантана маросими Фелип Анхелес халқаро аэропортида бўлиб ўтди. Бу ҳақда Мексика Ташқи ишлар вазирлиги маълум қилди.

Маросимда сўзга чиққан Ташқи ишлар вазири Хуан Рамон де ла Фуэнте Мексика дунёнинг барча бурчакларидан келадиган меҳмонларни илиқлик, тартиб, хавфсизлик ва ҳурмат билан кутиб олишга тайёр эканини таъкидлаган. Унинг сўзларига кўра, Мексика “институтлари орқали ҳаракат қиладиган ва қонун устуворлиги асосида яшайдиган” мамлакатдир.

Билдирилишича, жорий йилнинг 22 февраль куни “Халиско – янги авлод” гиёҳванд моддалар картели етакчиси Немесио Осегуэра Сервантеснинг (лақаби “Эль Менчо”) ўлдирилишидан сўнг Мексиканинг бир нечта ҳудудларида, жумладан, Гвадалахарада ҳам тартибсизликлар бошланган. 

24 февраль куни хавфсизлик кучлари ва наркокартеллар ўртасидаги тўқнашувлар фонида бўлажак Жаҳон чемпионати ўйинлари Мексикадан бошқа жойга кўчирилиши мумкинлиги ҳақида хабарлар пайдо бўлди. 

ОАВ маълумотларига кўра, FIFA расмийлари вазият кескинлашган тақдирда муқобил вариантларни кўриб чиқишни бошлаган. Бироқ ўйинларни кўчириш фақат хавфсизлик ходимлари ва тижорат ҳамкорлари жиддий хавотир билдирган тақдирдагина, энг сўнгги чора сифатида кўриб чиқилиши айтилмоқда.

2026 йилги Жаҳон чемпионати 2026 йилнинг ёзида АҚШ, Мексика, Канада мезбонлигида ўтказилади. Турнирда Ўзбекистон миллий терма жамоаси Португалия, Колумбия ва (Конго, Ямайка ва Янги Каледония) плей-офф ғолиб билан бирга “К” гуруҳидан ўрин олган.

Эслатиб ўтамиз, аввалроқ FIFA президенти Жанни Инфантино Мексикадаги кескин вазият фонида 2026 йилги Жаҳон чемпионати ўйинларини мамлакатда ўтказиш масаласида хотиржам эканлигини маълум қилганди.