Зеленская россиялик ҳарбийларни жинсий зўравонлик бўйича жавобгарликка тортишга чақирди

Россия аскарлари Украинадаги Россия уруши пайтида украиналик аёлларни зўрлаш ва бошқа жинсий зўравонлик ҳаракатлари учун жавобгарликка тортилиши керак. Бу ҳақда Украина биринчи хоними Елена Зеленская можаролар вақтида жинсий зўравонликнинг олдини олишга бағишланган халқаро конференцияда сўзлаган нутқида айтиб ўтди. 

Лондондаги саммитда сўзлаган Зеленская Украинадаги узоқ давом этган урушда жинсий зўравонлик “тизимли ва очиқ” содир этилганини айтди. Телефон ёзувларида рус аскарлари уйдаги оилалари билан зўрлаш ҳақида очиқчасига муҳокама қилишаётгани кўрсатилган. 

“Жинсий зўравонлик кимдандир устунлигингизни исботлашнинг энг шафқатсиз усулидир. Уруш пайтида бундай зўравонлик қурбонлари гувоҳлик беришлари қийин, чунки ҳеч ким ўзини хавфсиз ҳис қилмайди”, дейди у. 

Айни вақтда Елена Зеленская Буюк Британия пойтахти Лондонда бўлиб турибди.

“Бу улар қурол сифатида ишлатадиган яна бир восита. Бу уруш ва можарода уларнинг арсеналидаги яна бир қуролдир. Шунинг учун улар ундан тизимли ва очиқ фойдаланишади”, дея қўшимча қилди у. 

Кейинроқ Зеленская Буюк Британия Бош вазири Риши Сунакнинг Даунинг-стритдаги қароргоҳига ташриф буюрди. Уни Сунакнинг рафиқаси Акшата Мерти кутиб олди ва хонимлар фотографлар олдида қароргоҳ ташқарисидаги арчани безатди.