Зарафшонда йўқолиб кетгани айтилган Ўрта Осиё суғури излари топилди

Экологлар томонидан йўқолиб кетган дея айтилган ҳамда Қизил китобга киритилган Ўрта Осиё суғури излари Зарафшон миллий боғида Зарафшон дарёсига қуйилувчи зовур бўйидан топилди. Бу ҳақда QALAMPIR.UZ’га боғ ходими, экофаол Наталья Мармазинская хабар берди. 

Қайд этилишича, ушбу суғур нафақат Қизил китобга, балки Халқаро табиатни муҳофаза қилиш иттифоқининг Қизил рўйхатига ҳам киритилган.

Мармазинскаяга кўра, Ўрта Осиё суғури Зарафшон миллий табиат боғида 1980-йилларда қайд этилган, шундан сўнг у ҳақида ишончли маълумотлар топилмаган. Шу сабаб, боғ ҳудудидан ва Зарафшон дарёси водийсидан йўқ бўлиб кетган деб ҳисобланган. Ўтган йилнинг октябрь ойидда суғур Зарафшон миллий табиат боғининг 4-участкасида 2 нуқтада, жорий йилнинг январь ойида эса 2-участка ҳудудида ишончли тарзда қайд этилган. Эксперт баҳосига кўра, боғда 2-3 та суғур оиласи яшайди.

Ҳозирги вақтда Ўрта Осиё суғурига Зарафшон миллий боғи ҳудудида ўрмонларнинг кесилиши, мол боқилиши ва қаровсиз қолдирилган итлар хавф туғдиради. Лекин асосий хавф қум-шағал қазиб олиш ҳамда тўғон қурилиши сабаб Зарафшон дарёси тубининг деградация бўлиши ҳисобланади.